Тошкентдаги энг тирбанд кўчалардан бири яна 3 кунга ёпилади

Тошкент шаҳридаги Кичик ҳалқа автомобиль йўлининг бир қисми қурилиш-монтаж ишлари олиб борилиши муносабати билан 4 кунга транспорт ҳаракати учун ёпилади. Бу ҳақда Тошкент шаҳрида Йўл ҳаракатини ташкил этиш маркази хабар берди.

Қайд этилишича, Кичик ҳалқа автомобиль йўлининг Бунёдкор шоҳ кўчаси билан кесишмасидан Арнасой кўчаси билан кесишмасигача бўлган қисмида қурилиш-монтаж ишлари олиб борилади.

Аввалроқ, ушбу йўлнинг қарама-қарши томонида капитал таъмирлаш ва янги асфальт қопламасини ётқизиш ишлари якунланган эди. Эндиликда мазкур ишлар йўлнинг иккинчи томонида давом эттирилиб, юқори сифатли асфальт қопламаси ётқизилади.

Шу муносабат билан бугун, 6 август соат 23:00 дан 10 август соат 08:00 гача йўлнинг таъмирланаётган томони, яъни Кичик ҳалқа автомобиль йўлининг Бунёдкор шоҳ кўчаси билан кесишмасидан Арнасой кўчаси билан кесишмасигача бўлган қисми транспорт ҳаракати учун вақтинча ёпилади.

Маълум қилинишича, автотранспорт воситалари оқими қарама-қарши томонга йўналтирилади ва ҳаракат харитада яшил ранг билан кўрсатилган вақтинчалик схема асосида ташкил этилади. Тез тиббий ёрдам хизмати транспорт воситалари учун алоҳида вақтинчалик ҳаракат йўналиши ташкил этилади.

Ҳайдовчилардан йўл белгиларига риоя қилиш, тезликни пасайтириш ва ҳаракат йўналишини олдиндан режалаштириш сўралган. Мазкур вақтинчалик чекловлар йўлни сифатли капитал таъмирлаш ва асфальт қопламасини сифатли ётқизиш ҳамда ишларни хавфсиз якунлаш учун зарурлиги қайд этилган.

Эслатиб ўтамиз, аввалроқ Тошкент шаҳридаги Мустақиллик шоҳ кўчасининг иккинчи босқичида асфальт ётқизиш ишларини якунлаш муносабати билан айрим кўчаларда транспорт ҳаракати вақтинча чекланган эди.