Тошкентда “квартира”сини нарколабораторияга айлантирганлар ушланди (видео)

Тошкентнинг Яккасарой ва Чилонзор туманларида “закладка” усулида гиёҳвандлик воситаларини тарқатиб келган шахслар қўлга олинди. Бу ҳақда Ички ишлар вазирлиги хабар берди.

Қайд этилишича, жорий йилнинг 3 август куни тезкор тадбирлар давомида 1993 йилда туғилган шахс ҳамда унинг жиноий шериги, муқаддам Жиноят кодексининг 273-(Гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) ва 168-моддалари (Фирибгарлик) билан судланган, 1992 йилда туғилган шахс қўлга олинган.

Улар Яккасарой туманида гашиш гиёҳвандлик воситаларини “закладка” усулида тарқатаётган вақтида ушланган.

Ҳодиса жойида уларга тегишли Nexia-3 русумли автомашина кўздан кечирилганда, 20 грамм гашиш мойи аниқланиб, расмийлаштириб олинган.

Тезкор тадбирлар давомида гумонланувчиларнинг яшаш манзиллари ҳам текширилган. У ердан 2 килограмм гашиш мойи, “марихуана” ва гашиш, шунингдек, гиёҳвандлик воситаларини қадоқлаш ва тарқатишда фойдаланилган зип-пакетлар, изоляцион ленталар ҳамда бошқа ашёлар топилган.

Бундан ташқари, Мирзо Улуғбек туманида улар ижарага олган уйини нарколабораторияга айлантиргани аниқланган.

Мазкур хонадонни кўздан кечириш давомида нарколаборатория учун зарур бўлган ускуналар, 1 килограмм тамаки, 1 килограмм кукунсимон модда, гашиш мойи ва гашиш, 2 дона электрон тарози, 5 минг дона зип-пакет, 1,5 минг дона бўш капсула, резина қопқоқлар, тиббиёт ниқоблари, изоленталар, шприцлар ҳамда тайёр ҳолдаги гашиш гиёҳвандлик воситалари аниқланиб, расмийлаштириб олинган.

Маълумотларга кўра, жами 2 килограмм 170 грамм, яъни 10 минг 700 дозага тенг гиёҳвандлик воситалари ноқонуний муомаладан чиқарилган.

Ҳолат юзасидан гумонланувчиларга нисбатан Жиноят кодексининг 273-моддаси (Гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилган.

Эслатиб ўтамиз, аввалроқ Тошкент шаҳри Яшнобод туманида фуқаронинг дала майдонидан 47 туп гиёҳвандлик воситасига ўхшаш ўсимлик аниқлангани ҳақида хабар берилган эди.