Toshkentda “kvartira”sini narkolaboratoriyaga aylantirganlar ushlandi (video)

Toshkentning Yakkasaroy va Chilonzor tumanlarida “zakladka” usulida giyohvandlik vositalarini tarqatib kelgan shaxslar qo‘lga olindi. Bu haqda Ichki ishlar vazirligi xabar berdi.

Qayd etilishicha, joriy yilning 3 avgust kuni tezkor tadbirlar davomida 1993 yilda tug‘ilgan shaxs hamda uning jinoiy sherigi, muqaddam Jinoyat kodeksining 273-(Giyohvandlik vositalarini, psixotrop moddalarni yoki ularning analoglarini o‘tkazish maqsadini ko‘zlab qonunga xilof ravishda tayyorlash, qayta ishlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) va 168-moddalari (Firibgarlik) bilan sudlangan, 1992 yilda tug‘ilgan shaxs qo‘lga olingan.

Ular Yakkasaroy tumanida gashish giyohvandlik vositalarini “zakladka” usulida tarqatayotgan vaqtida ushlangan.

Hodisa joyida ularga tegishli Nexia-3 rusumli avtomashina ko‘zdan kechirilganda, 20 gramm gashish moyi aniqlanib, rasmiylashtirib olingan.

Tezkor tadbirlar davomida gumonlanuvchilarning yashash manzillari ham tekshirilgan. U yerdan 2 kilogramm gashish moyi, “marixuana” va gashish, shuningdek, giyohvandlik vositalarini qadoqlash va tarqatishda foydalanilgan zip-paketlar, izolyatsion lentalar hamda boshqa ashyolar topilgan.

Bundan tashqari, Mirzo Ulug‘bek tumanida ular ijaraga olgan uyini narkolaboratoriyaga aylantirgani aniqlangan.

Mazkur xonadonni ko‘zdan kechirish davomida narkolaboratoriya uchun zarur bo‘lgan uskunalar, 1 kilogramm tamaki, 1 kilogramm kukunsimon modda, gashish moyi va gashish, 2 dona elektron tarozi, 5 ming dona zip-paket, 1,5 ming dona bo‘sh kapsula, rezina qopqoqlar, tibbiyot niqoblari, izolentalar, shpritslar hamda tayyor holdagi gashish giyohvandlik vositalari aniqlanib, rasmiylashtirib olingan.

Ma’lumotlarga ko‘ra, jami 2 kilogramm 170 gramm, ya’ni 10 ming 700 dozaga teng giyohvandlik vositalari noqonuniy muomaladan chiqarilgan.

Holat yuzasidan gumonlanuvchilarga nisbatan Jinoyat kodeksining 273-moddasi (Giyohvandlik vositalarini, psixotrop moddalarni yoki ularning analoglarini o‘tkazish maqsadini ko‘zlab qonunga xilof ravishda tayyorlash, qayta ishlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 5-qismi bilan jinoyat ishi qo‘zg‘atilgan.

Eslatib o‘tamiz, avvalroq Toshkent shahri Yashnobod tumanida fuqaroning dala maydonidan 47 tup giyohvandlik vositasiga o‘xshash o‘simlik aniqlangani haqida xabar berilgan edi.