Тошкентда клиника ходими беморга шилқимлик қилди

Тошкентнинг Бектемир туманида жойлашган хусусий клиника менежери беморга нисбатан шаҳвоний шилқимлик қилгани учун маъмурий жавобгарликка тортилди. QALAMPIR.UZ суд ҳужжати билан танишди.

Суд ҳужжатларига кўра, воқеа 2026 йил 10 июнь куни клиника биносида содир бўлган. Менежер беморга нисбатан унинг шаъни ва қадр-қимматини камситувчи мазмундаги гапларни айтган, шунингдек, қўлларига тегиб, силаган ва кўкрак қисмига тирсаги билан тегиб, жинсий шилқимлик қилган.

Жабрланувчининг суддаги кўрсатмасига кўра, клиника ходими лифтда ва хоналарни кўрсатиш жараёнида унга ножўя гаплар айтган. Аёлнинг таъкидлашича, у билан бўлган кейинги телефон суҳбатларини аудиоёзувга олган ва ушбу материалларни судга тақдим этган.

Суд қарорида қайд этилишича, унинг айби жабрланувчи ва бошқа шахсларнинг тушунтириш хатлари, аудиоёзувлар ҳамда иш бўйича тўпланган бошқа далиллар билан тўлиқ тасдиқланган.

Тошкент шаҳар жиноят ишлари бўйича Бектемир туман суди клиника иш юритувчисини Маъмурий жавобгарлик тўғрисидаги кодекснинг 41¹-моддаси (шаҳвоний шилқимлик қилиш) 1-қисмида назарда тутилган ҳуқуқбузарликни содир этган деб топган.

Суд унга 5 сутка маъмурий қамоқ жазоси тайинлади. Бундан ташқари, ундан маъмурий қамоқда сақлаш билан боғлиқ харажатлар ҳам ундирилиши белгиланган.

Эслатиб ўтамиз, аввалроқ Сурхондарё вилоятида Ўзбекистон темир йўллари чиптачиси йўловчи аёлга шаҳвоний шилқимлик қилгани учун 5 суткага қамалганди.