Тошкентда 9 ёшли боланинг ўлимига сабабчи бўлган шифокор қамалди

Ўтган йилнинг август ойида хусусий клиникада 9 ёшли бола бурун соҳасидаги жарроҳлик амалиётидан кейин вафот этгани ҳақида хабар берилганди. Жорий йилнинг 12 март куни ўтказилган судда шифокор касб вазифаларини зарур даражада бажармаганликда айбдор деб топилиб, 4 йилга озодликдан маҳрум қилинди. Бу ҳақда “Миллар” хабар берди.

Марҳум болакайнинг яқинлари маълум қилишича, бола соғлом бўлиб, ўз оёқлари билан хусусий клиникага юриб борган. Унинг яқинлари боланинг ўлимига айбдор бўлган шахсларга энг оғир жазо берилишини сўраган. 

Операция Тошкент шаҳридаги “Paeonnis” хусусий клиникасида ўтказилган. 9 ёшли боланинг бурнида аденоид аниқланган ва клиника шифокорлари уни жарроҳлик йўли билан олишни айтган. Судланувчилардан бирининг судда берган кўрсатмасига кўра, ушбу клиникада жонлантириш бўлими умуман бўлмаган.

Жорий йилнинг 12 март куни Жиноят ишлари бўйича Мирзо Улуғбек туман судида боланинг ўлимига оид жиноят иши кўриб чиқилган. Суд ҳукмига кўра, хусусий клиникада ишлаган анестезиолог-реаниматолог ҳамда лор шифокор Жиноят кодексининг 116-моддаси (касб вазифаларини лозим даражада бажармаслик) 3-қисми билан айбдор деб топилиб, 4 йилга озодликдан маҳрум қилиш, 3 йил давомида жарроҳлик амалиётида иштирок этиш ҳуқуқидан маҳрум қилиш жазоси берилган. Жазо манзилли колонияларда ўталиши белгиланган.

Эслатиб ўтамиз, аввалроқ Самарқанд шаҳрида бурун операциясига кирган 16 ёшли қиз шифохонада вафот этганди.