Тошкентда 3 эркак 20 ёшли қизни ўғирлади
3-саҳифа
−
30 Январь
13457Ижтимоий тармоқларда номаълум шахслар Cobalt русумли автомобилда қизни ўғирлаб кетаётгани акс этган видео тарқалди. Мазкур ҳолат юзасидан Тошкент шаҳар Ички ишлар бош бошқармаси маълумот берди.
Билдирилишича, воқеа пойтахтда содир бўлган. Қизни ўғирлашни ташкил қилган шахс 1994 йилда туғилган А. исмли йигит бўлиб, у ўз танишлари билан тил бириктирган ҳолда 2004 йилда туғилган И. исмли қизни ўғирлаб кетган.
“Биринчи ўғрилик уйим яқинида содир бўлди. Видеода уч нафари кўриниб турибди. Кейинроқ менга тушунтиришларича, у камерага тушишни истамаган. Менда ҳалигача битмай келаётган кичик чандиқлар қолган. Бош билан урилганимдан кейин тез-тез бош оғриғи пайдо бўлади”, дейди қиз.
Айни пайтда у билан психологлар ва ички ишлар органлари ходимлари ишламоқда.
QALAMPIR.UZ бу борада батафсил маълумот олиш мақсадида Тошкент шаҳар Ички ишлар бош бошқармаси матбуот котиби Нилуфар Исохонова билан боғланди.
Унинг бизга маълум қилишича, қиз уни ўғирлаб кетган тўданинг боши А. билан ўзаро ишқий муносабатда бўлган. Қиз йигит билан кетишни хоҳламаган, шунинг учун йигит уни ўғирлашга қарор қилган. У 2024 йилнинг ноябрь ойида қизни тоққа ҳам олиб қочиб кетган.
Қизнинг ота-онаси И.нинг йўқолиб қолгани ҳақида ички ишлар идорасига маълум қилган. Аммо бир неча кун ўтиб қизнинг ўзи қайтиб келган ҳамда ҳеч қандай даъвоси йўқлигини айтган.
Жорий йилнинг 26 январь куни қиз иккинчи марта ўғирлаб кетилгандан кейин ноябрдаги биринчи ўғрилик видеоси интернетга чиқарилган. Шундан сўнг 28 январь куни пойтахт ИИББ томонидан қиз топилган.
Мазкур ҳолат юзасидан Жиноят кодексининг 137-моддаси (одам ўғирлаш) ва 138-моддаси (зўрлик ишлатиб ғайриқонуний равишда озодликдан маҳрум қилиш) билан жиноят иши қўзғатилган. Ўғирлашда иштирок этган барча шахслар аниқланган ва қўлга олинган. Уларга нисбатан қамоққа олиш тарзидаги эҳтиёт чораси қўлланган.
“Мазкур ҳолат Тошкент шаҳар ИИББ бошлиғи назорати остида. Тергов якунлангач, қонуний қарор қабул қилинади”, дейилади хабарда.
Эслатиб ўтамиз, аввалроқ Қашқадарё вилоятининг Яккабоғ туманида 24 ёшли йигит ўзининг маҳалладоши бўлган 17 ёшли қизни олиб қочиб кетганди. Маълум бўлишича, йигитнинг совчилари қизнинг ота-онасидан рад жавобини олган. Шундан сўнг, 2023 йилнинг 10 март куни йигит ўқув марказидан чиқиб, уйига қайтаётган қизни ўзининг Damas русумли машинасига ўтказиб, Тошкентга олиб кетган.