Тошкентда 22 ёшли қизни фоҳишалик учун четга олиб кетаётган аёл ушланди (видео)

Тошкент вилоятида ўтказилган “Хавфсиз ва соғлом юрт” профилактик тадбирлари давомида яна бир шахснинг одам савдоси қурбони бўлишининг олди олинди. Бу ҳақда вилоят Ички ишлар бош бошқармаси хабар берди.

Қайд этилишича, ўтказилган тезкор тадбирда Ангрен шаҳрида яшовчи 1971 йилда туғилган X.T. исмли аёл осон пул топиш мақсадида ўзига таниш бўлган 2003 йилда туғилган З.А.) исмли қизни алдаб, мўмай даромад топишга ишонтириб, Тошкент халқаро аэропорти орқали Россиянинг Санкт-Петербург шаҳрига фоҳишалик учун олиб кетаётган вақтида далилий ашёлар билан ушланди.

Маълумотларга кўра, аёл ва 22 ёшли қизнинг Россияга бориш учун йўл ҳақи ва бошқа харажатлари Санкт-Петербургда яшовчи “Зуля” исмли аёл томонидан қопланган. Бунинг эвазига қиз кейинчалик фоҳишалик билан шуғулланиши керак бўлган. Шунингдек, аёл қизни етказгани учун “Зуля”дан маълум миқдорда ҳақ олишга келишган.

Ушланган шахсга нисбатан Қибрай тумани ИИБ ҳузуридаги Тергов бўлими томонидан Жиноят кодекси 135-моддаси (одам савдоси) 2-қисми “а”,”з” бандлари билан жиноят иши қўзғатилган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ “Хавфсиз ҳудуд” тезкор профилактик тадбирлари доирасида Тошкент халқаро аэропортида 2 қизни мўмай даромад ваъда қилиб, алдов йўли билан Туркияга жўнатаётган шахс қўлга олинганди.