Тошкентда ҳайит куни жамоат транспорти 1 соат олдин иш бошлайди

Рамазон ҳайити байрами муносабати билан жорий йил 20 март куни Тошкентда жамоат транспорти иш фаолиятини эрталабки соат 04:00 дан бошлайди. Бу ҳақда Тошкент шаҳар транспорт бош бошқармаси хабар берди.

Қайд этилишича, ушбу қарор жамоат транспорти орқали ҳайит намозида иштирок этишни режалаштираётган фуқаролар учун қулайлик яратиш мақсадида қабул қилинган.

Хусусан, 20 март – Рамазон ҳайити куни метро поездлари ҳаракати одатдагидан 1 соат олдин, яъни соат 04:00 дан йўловчиларга хизмат кўрсатишни бошлайди.

Байрам кунларида “Тошкент метрополитени” ДУК йўналишларида поездлар ҳаракати қуйидаги тартибда ташкил этилади:

• 2026 йил 20–21 март кунлари метро поездлари ҳаракати шанба куни учун белгиланган жадвал асосида амалга оширилади.
• 2026 йил 22–23 март кунлари эса метро поездлари якшанба куни учун тасдиқланган жадвал асосида ҳаракатланади.

Йўловчилардан мазкур жадвални инобатга олган ҳолда ўз ҳаракатларини режалаштириш сўралади.

Эслатиб ўтамиз, аввалроқ Ўзбекистонда жорий йилда Рамазон ҳайитининг биринчи куни 20 мартга тўғри келиши ҳақида хабар берилган эди. Байрамлар муносабати билан қуйидаги кунлар дам олинади:

• 20 март (жума) – Рамазон ҳайити куни – барча учун дам олиш куни;
• 21 март (шанба) – Наврўз байрами куни – барча учун дам олиш куни;
• 22 март (якшанба) – дам олиш куни. 
• 23 март (душанба) - 5 кунлик иш ҳафтасидаги ходимлар учун дам олиш куни (ишланмайдиган байрам куни дам олиш кунига тўғри келганлиги сабабли, байрамдан кейинги иш кунига кўчирилган дам олиш куни) 6 кунлик иш ҳафтасидаги ходимлар учун иш куни.