“Толибон” Қобулдаги намойишларни тарқатиш учун қуролни ишга солди (видео)

Олам 12574
image

Аввалроқ, Афғонистоннинг бир қанча шаҳарларида “Толибон” ҳаракати ва қўллаб-қувватлаётгани айтилаётган Покистонга қарши намойишлар ўткизилаётгани ҳақида хабар бергандик.

Ҳозирда Афғонистон пойтахти Қобулда “Толибон” Покистонга қарши намойишчиларини ўққа тута бошлади. Бироқ қурбонлар ҳақида ҳозирча ҳеч қандай маълумот йўқ, дея ёзмоқда РИА Новости.

Намойишлар “Толибон” таклифига биноан Покистон идоралараро разведка бошлиғи Файз Ҳамиднинг Афғонистон пойтахтига ташрифидан сўнг, бошланган.

Маълум қилинишича, намойишчилар Қобул шимолидан Покистоннинг Афғонистондаги элчихонасигача юриб борган.

Нашрнинг таъкидлашича, “Толибон” ҳаракати вакили Забиҳулла Мужоҳид аҳолини намойишлар ўтказмасликка чақирган, чунки мамлакат “эндигина инқироздан чиққан”.

Хабарга кўра, ҳаракат вакиллари, шунингдек, журналистларга Қобулда бўлаётган намойишларни тасвирга олишга рухсат бермаяпти.

Эслатиб ўтамиз, Панжшер лидери аввал ҳам Афғонистон халқига мурожаат билан чиққан. Ўшанда Аҳмад Масъуд “Биз Аллоҳ, эркинлик ва адолат учун курашишдан ҳеч қачон воз кечмаймиз”, дея барчани бардам бўлишга чақирганди.

Қайд этиш керакки, ОАВда “Толибон” Афғонистондаги энг йирик ҳарбий база — Баграмни Хитойга, бундан ташқари Қандаҳордаги аэродромни эса Покистонга бериши мумкинлиги ҳақида хабарлар пайдо бўлди. Толиблар ушбу икки давлат билан ҳам жуда яқин алоқада. 

Шу ўринда, АҚШ ва НАТО кучлари Афғонистонни тарк этганига қадар, чет эл қўшинларига қарши курашиш, уларни мамлакатдан чиқариб юбориш “Толибон” ҳаракатининг асосий мақасади бўлганини эслаб ўтиш керак. Зеро, уларнинг бугунги сиёсати аввалги гап-сўзларига унчалик ҳам тўғри келмаяпти.

Афғонистондаги вазият

АҚШнинг Афғонистонда 20 йил давом этган ҳарбий операцияси Президент Жо Байден даврига келиб якунланди. АҚШ қўшинлари жорий йилнинг 31 август куни мамлакатни тарк этди. Бунга қадар Европанинг бошқа давлатлари, жумладан Британия ва Германия ҳам мамлакатни тарк этди. Ушбу жараён якунланмасидан “Толибон” ҳаракати пойтахт Қобулни эгаллаб, жорий йилнинг 15 август куни Афғонистон Ислом Республикасини қулатди. 19 август кунига келиб толиблар Афғонистон Ислом Амирлиги тузулганини эълон қилди.

Диёра Абдураҳмoнова
Мақолага баҳо беринг
Баҳолаганлар: 120
Рейтинг: 3.1
t
×