Тиллага “кўмилган” келин ҳам ҳибсга олинди

Аввалроқ, Туркиянинг Ван шаҳрида ижтимоий тармоқларда машҳур бўлган мода дизайнери ва тадбиркор Чағли Ўз ҳамда “Ванли Қора Ҳайдар” лақаби билан танилган блогер Меҳмет Фотиҳ Танчаланнинг тўйида уларга тақилган катта миқдордаги олтин ва пуллар текширувга сабаб бўлиб, куёв Меҳмет Фотиҳ Танчалан ҳибсга олингани ҳақида хабар берилган эди. Энди ушбу текширув доирасида унинг рафиқаси Чағли Ўз ҳам қўлга олинди. Бу ҳақда “Haberler” хабар берди.

Тўйида қиймати 44 миллион турк лираси экани айтилган тақинчоқлар билан кун тартибига чиққан эр-хотиннинг тўйида тақилган олтин, валюта ва турк лираси манбаси тергов доирасида текширилмоқда. Тўй ортидан Меҳмет Фотиҳ Танчалан ҳибсга олинган бўлса, энди унинг рафиқаси Чағли Ўз ҳам қўлга олинди.

Ван Бош прокуратураси Танчалан юзасидан интернетдаги материаллар билан боғлиқ ҳолда “турк миллатини, Туркия Республикаси давлатини, давлатнинг муассаса ва органларини ҳақорат қилиш” жинояти бўйича тергов бошлаган. Танчалан “жиноятдан олинган мол-мулк қийматликларини легаллаштириш”да айбланиб, ҳибсга олинган.

Тўйда тақилган олтин, заргарлик буюмлари, валюта ва турк лираси текшириш учун Молиявий жиноятларни тергов қилиш кенгашидан (MASAK) экспертиза ўтказиш сўралган. Контрабанда ва уюшган жиноятчиликка қарши кураш бўлими – KOM ходимлари эса тўй “ҳаётнинг одатий кечишига зид тарзда” ташкил этилганини қайд этган.

Тўйдан сўнг Танчалан юзасидан бошланган суд-ҳуқуқ жараёни ҳибсга олиш қарори билан якунланган бўлса, иш бўйича эътиборга молик янги ривожланиш юз берган. Танчаланнинг ортидан унинг рафиқаси Чағли Ўз ҳам қўлга олинган.

Маълумотларга кўра, Танчалан тергов доирасида Мурадия туманидаги уйида қўлга олинган. Молиявий текширув эр-хотиннинг 6 сентябрь куни Ван вилоятининг Тушба туманида, Эржиш йўли бўйидаги “Parla Delux” тўйхонасида ўтказган тўйини ҳам қамраб олган.

Тузилган баённомада Чағли Ўзнинг бўйнида катта олтин кўринишидаги маржон, икки қўлида катта олтин билагузуклар, кўплаб билагузук ва маржонлар, катта зираклар ҳамда олтин тожга ўхшаш заргарлик буюмлари бўлгани қайд этилган. Тўйга оид айрим материалларда “оғирлиги ўзининг вазнича олтин тақилди” деган ибора ҳам ишлатилгани текширувга киритилган.

KOM ходимлари баённомасида эр-хотинга катта миқдордаги хорижий валюта ва турк лираси банкнотлари ҳам тақинчоқ сифатида тақилгани қайд этилган. Шунингдек, эр-хотиннинг тўй олдидан ва тўй вақтида кийган кийимлари ҳамда жамоатчиликка тарқалган видеолар текширув доирасига киритилган.

Танчаланнинг ҳибсга олинганидан сўнг Чағли Ўз шахсий аккаунтини ёпгани ва сукут сақлаётгани айтилган.

Эслатиб ўтамиз, аввалроқ Туркиядаги ўз тўйида тилла ўғирлаб кетишга оид воқеа содир бўлган эди. Унда ўзбекистонлик келин асосий фигурантга айланганди. Яъни ўзбекистонлик М.Б.га тўйидан сўнг уйда қолган тилла ва зийнат буюмлари билан бирга ғойиб бўлди, деган айблов қўйилган. Бироқ у ўз ихтиёри билан маҳаллий полиция бўлимига бориб, ҳолат юзасидан кўрсатма берган. Унга кўра, тўйда тақилган тилла буюмларни онаси билан биргаликда қайнотасига топширган. Шунингдек, қайнотаси кейинчалик ушбу тиллаларни кредит ва бошқа қарзларини тўлаш учун сотганини ўзаро ёзишмаларда қайд этган.