Tillaga “ko‘milgan” kelin ham hibsga olindi

Avvalroq, Turkiyaning Van shahrida ijtimoiy tarmoqlarda mashhur bo‘lgan moda dizayneri va tadbirkor Chag‘li O‘z hamda “Vanli Qora Haydar” laqabi bilan tanilgan bloger Mehmet Fotih Tanchalanning to‘yida ularga taqilgan katta miqdordagi oltin va pullar tekshiruvga sabab bo‘lib, kuyov Mehmet Fotih Tanchalan hibsga olingani haqida xabar berilgan edi. Endi ushbu tekshiruv doirasida uning rafiqasi Chag‘li O‘z ham qo‘lga olindi. Bu haqda “Haberler” xabar berdi.

To‘yida qiymati 44 million turk lirasi ekani aytilgan taqinchoqlar bilan kun tartibiga chiqqan er-xotinning to‘yida taqilgan oltin, valyuta va turk lirasi manbasi tergov doirasida tekshirilmoqda. To‘y ortidan Mehmet Fotih Tanchalan hibsga olingan bo‘lsa, endi uning rafiqasi Chag‘li O‘z ham qo‘lga olindi.

Van Bosh prokuraturasi Tanchalan yuzasidan internetdagi materiallar bilan bog‘liq holda “turk millatini, Turkiya Respublikasi davlatini, davlatning muassasa va organlarini haqorat qilish” jinoyati bo‘yicha tergov boshlagan. Tanchalan “jinoyatdan olingan mol-mulk qiymatliklarini legallashtirish”da ayblanib, hibsga olingan.

To‘yda taqilgan oltin, zargarlik buyumlari, valyuta va turk lirasi tekshirish uchun Moliyaviy jinoyatlarni tergov qilish kengashidan (MASAK) ekspertiza o‘tkazish so‘ralgan. Kontrabanda va uyushgan jinoyatchilikka qarshi kurash bo‘limi – KOM xodimlari esa to‘y “hayotning odatiy kechishiga zid tarzda” tashkil etilganini qayd etgan.

To‘ydan so‘ng Tanchalan yuzasidan boshlangan sud-huquq jarayoni hibsga olish qarori bilan yakunlangan bo‘lsa, ish bo‘yicha e’tiborga molik yangi rivojlanish yuz bergan. Tanchalanning ortidan uning rafiqasi Chag‘li O‘z ham qo‘lga olingan.

Ma’lumotlarga ko‘ra, Tanchalan tergov doirasida Muradiya tumanidagi uyida qo‘lga olingan. Moliyaviy tekshiruv er-xotinning 6 sentyabr kuni Van viloyatining Tushba tumanida, Erjish yo‘li bo‘yidagi “Parla Delux” to‘yxonasida o‘tkazgan to‘yini ham qamrab olgan.

Tuzilgan bayonnomada Chag‘li O‘zning bo‘ynida katta oltin ko‘rinishidagi marjon, ikki qo‘lida katta oltin bilaguzuklar, ko‘plab bilaguzuk va marjonlar, katta ziraklar hamda oltin tojga o‘xshash zargarlik buyumlari bo‘lgani qayd etilgan. To‘yga oid ayrim materiallarda “og‘irligi o‘zining vaznicha oltin taqildi” degan ibora ham ishlatilgani tekshiruvga kiritilgan.

KOM xodimlari bayonnomasida er-xotinga katta miqdordagi xorijiy valyuta va turk lirasi banknotlari ham taqinchoq sifatida taqilgani qayd etilgan. Shuningdek, er-xotinning to‘y oldidan va to‘y vaqtida kiygan kiyimlari hamda jamoatchilikka tarqalgan videolar tekshiruv doirasiga kiritilgan.

Tanchalanning hibsga olinganidan so‘ng Chag‘li O‘z shaxsiy akkauntini yopgani va sukut saqlayotgani aytilgan.

Eslatib o‘tamiz, avvalroq Turkiyadagi o‘z to‘yida tilla o‘g‘irlab ketishga oid voqea sodir bo‘lgan edi. Unda o‘zbekistonlik kelin asosiy figurantga aylangandi. Ya’ni o‘zbekistonlik M.B.ga to‘yidan so‘ng uyda qolgan tilla va ziynat buyumlari bilan birga g‘oyib bo‘ldi, degan ayblov qo‘yilgan. Biroq u o‘z ixtiyori bilan mahalliy politsiya bo‘limiga borib, holat yuzasidan ko‘rsatma bergan. Unga ko‘ra, to‘yda taqilgan tilla buyumlarni onasi bilan birgalikda qaynotasiga topshirgan. Shuningdek, qaynotasi keyinchalik ushbu tillalarni kredit va boshqa qarzlarini to‘lash uchun sotganini o‘zaro yozishmalarda qayd etgan.