Telegram асосчиси Францияда ҳибсга олинишини “полиция хатоси” деб атади

north_east

Франциядаги можаро фонида Дуров Ўзбекистонни мақтади (видео)

Telegram асосчиси Павел Дуров ўзининг Францияда ҳибсга олинишини “полиция хатоси” деб атади. Бу ҳақда Дуров ўзининг Telegram-каналида ёзди.

“Ажабланарлиси шундаки, мени француз полициясининг хатоси туфайли ҳибсга олишди: 2024 йил августигача улар Франция ва Европа Иттифоқи қонунларини эътиборсиз қолдириб, талаб қилинган ҳуқуқий тартиб-қоидалар орқали Telegram'га ўз сўровларини жўнатмаган”, деб ёзган у.

Дуровнинг сўзларига кўра, орадан бир йил ўтиб тергов унинг ва Telegram'нинг айбини аниқлай олмаган.

"Бизнинг модерация амалиётимиз саноат стандартларига мос келади ва Telegram ҳар доим Франциядан келган барча қонуний талабларга жавоб беради", дея қайд этди у.

Дуровнинг айтишича, унинг ҳибсга олинишининг ягона натижаси "Франциянинг эркин давлат сифатидаги обрўсига путур етказиш"дир.

Шунингдек, у ҳибсга олинганидан бир йил ўтиб ҳар 14 кунда Францияга қайтишга мажбур бўлаётганини, шу билан бирга апелляция муддати ҳали белгиланмаганини таъкидлади.

Ўтган йилнинг 24 август куни Дуров Париждаги Ле Бурже аэропортида бир қатор айбловлар, жумладан, жиноий гуруҳ таркибида ноқонуний операцияларни амалга ошириш мақсадида онлайн-платформани бошқаришда иштирок этганликда айбланиб ҳибсга олинган эди.