Таллинда “рус уйи” ёпилди. Россия бундан ташвишда

Жорий йилнинг июнь ойида Эстония пойтахти Таллин ҳокимияти Рус маданияти марказини (“рус уйи”) “Мере” маданият маркази деб қайта номлаш ва уни янги лойиҳа доирасида бошқа маданият марказига топшириш қарорини маъқуллаганди. Россия Ташқи ишлар вазирлиги сўзловчиси Мария Захарова мазкур қарор юзасидан Россия халқаро ҳамжамиятга ташвишларини билдирганини айтди.

“Россия томонининг Россия маданияти марказини тугатиш масаласидаги ташвишлари халқаро ҳамжамиятга етказилди. БМТ, ЙХҲТ ва UNESCO каби тегишли кўп томонлама майдонларда Россия Латвия, Литва ва Эстония ҳудудида яшовчи миллий озчиликларнинг маданий меросини сақлаш бўйича Болтиқбўйи давлатларининг халқаро мажбуриятларини бажаришига эришишда давом этади”, дейилади ТИВ сайтида эълон қилинган Захарова изоҳида.

Дипломатнинг билдиришича, Болтиқбўйи мамлакатларида рус тилида сўзлашувчи аҳолининг ҳуқуқларига, жумладан, таълим ва маданият соҳаларида, “фронтал ҳужум” давом этмоқда.

“Вазият ривожини диққат билан кузатиб борамиз”, дея қўшимча қилган у.

Қайд этиш жоиз, Таллин шаҳридаги Маданият ва спорт департаменти тасарруфидаги Россия маданияти маркази 30 июнь куни мустақил муассаса сифатида фаолиятини якунлаган. Бу ҳақдаги лойиҳа шаҳар ҳокимияти томонидан маъқулланиб, шаҳар кенгашига юборилган.

Ҳужжатга кўра, марказнинг айрим функциялари, жумладан, “Мере” бульваридаги биноларни бошқариш, “Маданият қозони” номли мақсадли муассасага топширилади. Шу билан бирга, ходимларнинг катта қисми ҳам шу фондга ўтади. Қолган йўналишлар, жумладан, ижодий ва ҳордиқ чиқариш фаолияти аввалига департамент томонидан, кейинчалик эса 2026 йил 1 январдан Канутиайа мактаби томонидан бошқарилади.

Бу қарор шаҳар коалицияси тасарруфидаги муассасалар фаолиятини оптималлаштириш, бошқарув сифатини ошириш ва жорий харажатларни қисқартириш режалари билан изоҳланган.

Шу орада Рус маданияти маркази ижодий жамоалари раҳбарлари ташкилотни сақлаб қолиш зарурлиги ҳақида пойтахт ҳокимиятига мурожаат қилган.

“Рус маданияти марказининг йўқ қилиниши маданиятнинг муҳим ўчоғидан айрилиш демакдир, бу эса муқаррар равишда жамиятнинг ижтимоий четлаштирилишига олиб келади”, дейилади уларнинг мурожаатида.

Бироқ Таллин расмийлари ижодий жамоа вакиллари билан учрашмаган ва мазкур мурожаатга эътибор қаратмаган.