Сурхондарёда оғзи шалоқ “замҳоким” сувчиларга болохонадор қилиб сўкинди (видео)

QALAMPIR.UZ’га Сурхондарё вилояти, Узун тумани ҳокимининг Боботоғ ҳудудини комплекс ривожлантириш масалалари бўйича ўринбосари Шодмон Аллабердиевга тегишли экани айтилган аудиоёзув келиб тушди. 

Овозда ҳоким ўринбосари фермерларнинг даласидаги сувга қарамагани сабабли сув хўжалиги ходимларини оғзига келган, куракда турмайдиган сўзлар билан ҳақорат қилгани эшитилади. Ушбу маълумотни тақдим қилган манбага кўра, ҳолат жорий йилнинг 25 ноябрь куни соат 08:00 лар атрофида туманнинг Мустақиллик маҳалласида содир бўлган. 

Ҳолатга аниқлик киритиш мақсадида QALAMPIR.UZ журналисти мулозимнинг ўзи билан боғланди, вазиятни эшитгач, Аллабердиев гўшакни қўйиб қўйди ва такрор қилган қўнғироқларга жавоб бермади. 

Қолаверса, таҳририят муносабат олиш мақсадида Ўзбекистон Республикаси Бош прокуратураси, Олий Мажлиснинг Инсон ҳуқуқлари бўйича вакили, Сув хўжалиги вазирлигига мурожаат қилди. Мутасаддилар вазиятдан бехабарлигини, тез фурсатда белгиланган тартибда ўрганиб чиқишларини маълум қилди. Сурхондарё вилояти ва Узун тумани ахборот хизматига бўлган боғланишларимиз эса бесамар кетди. Туман матбуот хизмати томонидан эълон қилинган 3 та телефон рақамининг бирортаси иш вақти бўлишига қарамай, такрор қўнғироқларимизга жавоб бермади. 

Кеча, 26 ноябрь куни кечқурун туман ҳокимлиги ўзининг ижтимоий тармоқлардаги саҳифасида расмий муносабат эълон қилиб, оғзидан боди кириб, шоди чиққан ҳоким ўринбосарига нисбатан хизмат текшируви тайинланганини маълум қилди. 

Унга кўра, Узун тумани ҳудудида ғалла майдонларини суғориш учун сув асосан кўтарма насослар орқали етказиб берилади. Шу боис, сувдан тежамкор ва белгиланган тартиб асосида фойдаланиш юзасидан масъулларга аниқ кўрсатмалар берилган.

Ўрганиш жараёнида айрим фермер хўжаликлари ва сув хўжалиги вакиллари томонидан белгиланган тартибга риоя этилмаётгани, сув ресурсларидан самарасиз фойдаланиш ҳолатлари аниқланган. Ушбу камчиликлар бир неча бор огоҳлантирилганига қарамай такрорлангани ва қонунчилик талаблари асосида тегишли чора кўрилгани маълум бўлган. QALAMPIR.UZ’да қайд этилган ўринбосарнинг кескин муомаласи ҳам айнан мазкур тартиббузарликлар сабаб юзага келгани аниқланган. 

“Мамлакатимизда нафақат раҳбарлар, балки барча давлат хизматчилари учун хизмат интизоми ва одоб-ахлоқ қоидалари қатъий белгилангани инобатга олиниб, мазкур ҳолат юзасидан масъул шахсга нисбатан хизмат текшируви тайинланди. Ҳозирда воқеанинг барча тафсилотлари ўрганилмоқда”, дейилади расмий муносабатда. 

Таъкидлаш жоизки, бундай ҳолатлар Ўзбекистон учун янгилик эмас, аввалроқ Асака, Боёвут,  Қўшработ, Бўка туманларида ҳокимларининг сўконғичлиги ҳақида етарлича хабарлар тарқалган.