Surxondaryoda muallim o‘quvchini kaltakladi

Ijtimoiy tarmoqlarda Surxondaryo viloyatida o‘qituvchi dars jarayonida o‘quvchini kaltaklagani aks etgan video tarqaldi. Holat yuzasidan viloyat Maktabgacha va maktab ta’limi boshqarmasi munosabat bildirdi.

Qayd etilishicha, mazkur holat joriy yilning 23 yanvar kuni Sho‘rchi tumanidagi 4-maktabda sodir bo‘lgan. 8-sinf o‘quvchilariga tarix darsi davomida o‘quvchi B.B. dars jarayoniga xalaqit bergani uchun o‘qituvchi X.D. unga tanbeh bergan.

Holat bo‘yicha maktab ma’muriyati tomonidan o‘quvchining ota-onasi bilan profilaktik suhbat olib borilib, bolaning tarbiyasiga jiddiy e’tibor qaratish, kelgusida bu kabi holatlarga yo‘l qo‘yilmasligi yuzasidan tushuntirish berilgan. Tarix fani o‘qituvchisi X.D. esa o‘z xohishiga binoan ishdan bo‘shatilgan.

Boshqarma xabariga ko‘ra, o‘quvchi B.B. ilgari sudlangan bo‘lib, Jinoyat kodeksining 169-moddasi (o‘g‘rilik) bo‘yicha javobgarlikka tortilgan va hozirda tuman IIBning profilaktik nazoratida turadi.

Eslatib o‘tamiz, avvalroq Farg‘ona viloyatining Marg‘ilon shahrida o‘qituvchi o‘quvchini beayov kaltaklagandi. Pedagogga xos bo‘lmagan harakatlarni sodir etgani uchun o‘qituvchiga nisbatan tegishli tartibda intizomiy jazo chorasi qo‘llangan.