Сурхондарёда қўшнисининг Spark’ини ҳайдаган 5-синф ўқувчиси аниқланди (видео)

Сурхондарё вилоятининг Жарқўрғон туманида 5-синф ўқувчиси қўшнисига тегишли Spark автомобилини бошқаргани аниқланди. Бу ҳақда вилоят Йўл ҳаракати хавфсизлиги бошқармаси хабар берди.

Қайд этилишича, Жарқўрғон туманидаги 19-мактабнинг 5-синфида таҳсил олувчи ўқувчи қўшнисига тегишли Spark автомобилини бошқариб, жараённи видеога олган ва ижтимоий тармоқларга жойлаган. Ҳолат интернетда кенг муҳокамаларга сабаб бўлган.

Шундан сўнг, вилоят ЙҲХБ мутахассислари вояга етмаган ўқувчи ва унинг онаси билан профилактик суҳбат ўтказиб, қонуний чоралар кўрган.

Онанинг айтишича, у ўғлининг машина бошқарганидан хабардор бўлмаган. Унинг билдиришича, ўғли автомобиль бошқаришга қизиққан ва ўзидан катта болаларга ҳавас қилган.

Аёл ўғлининг келажакда билимли бўлишини исташини, уни инглиз тили ва математика тўгаракларига қатнатаётганини билдирган. Шунингдек, бундан кейин фарзандининг тарбияси билан янада жиддий шуғулланишини айтган.

Ўқувчи эса Spark автомобилини бошқарганидан афсусда эканини билдириб, келгусида бундай ишни такрорламасликка ваъда берди. У йўл ҳаракати қоидаларини билмаганини айтиб, тенгдошларини ҳам бундай ҳаракатлардан тийилишга чақирган.

Эслатиб ўтамиз, аввалроқ Сурхондарё вилоятининг Термиз туманида 2010 йилда туғилган мактаб ўқувчиси онасининг Cobalt машинаси билан йўл-транспорт ҳодисасига учрагани ҳақида хабар берилган эди.