Spens Angliya termasidagi birinchi musulmon futbolchi sifatida tarix yozmoqda

25 yoshli Jed Spens Angliya terma jamoasi safida ilk bor o‘ynash arafasida. U nafaqat o‘zining futbol mahorati bilan, balki musulmon sifatida milliy jamoa darajasiga ko‘tarilgan ilk futbolchi bo‘lishi mumkinligi bilan ham tarix yaratmoqda. Bu haqda BBC xabar qildi.

Spens ilgari “Midlsbro” safida porlab, keyin “Tottenxem” tomonidan sotib olingan, biroq bir necha bor ijaraga berilgan edi. Faqat so‘nggi mavsumdagina u o‘z o‘rnini topdi: Premer-ligada deyarli har bir daqiqa maydonda bo‘ldi, Yevropa Ligasida muhim uchrashuvlarda jamoasiga yordam berdi va “shporlar”ni Chempionlar ligasiga qaytishida asosiy rol o‘ynadi.

Endi u Andorra va Serbiyaga qarshi JCH saralash bahslarida Angliya terma jamoasi sharafini himoya qiladi.

“Bu ne’mat – shunchaki ajoyib. Men ko‘p duo qilaman, doimo shukrona qilaman. Og‘ir damlarimda ham Alloh yonimda bo‘lganiga ishonaman. Bu men uchun eng katta kuch manbayi”, deydi Spens.

U o‘z dini tufayli qo‘shimcha bosim sezmasligini aytadi va o‘z hikoyasi ko‘plab bolalar uchun ilhom manbayi bo‘lishiga umid qiladi.

“Agar men qila olsam, siz ham qila olasiz. Bu nafaqat musulmon bolalar, balki har qanday e’tiqodli bola uchun misol bo‘lishi mumkin”, deydi u.

Spensning yo‘li oson bo‘lmadi: jarohatlar, chetlatilishlar, hatto Yevropa chempionatida ishtirok etish imkoniyatini boy berishi. Lekin u har doim kurashni davom ettirdi va bugun Angliya terma jamoasining eng ko‘p kutilgan debyutantlaridan biriga aylandi.

Uni 21 yoshgacha bo‘lganlar terma jamoasida ishlagan murabbiy Li Karsli shunday ta’riflagan edi:

“Jed juda sezgir va hujumkor sportchi. U to‘p bilan tezkor, driblingi kuchli va himoyada ham ishonchli. Uning salohiyati juda katta”.

Spens endi nafaqat “Tottenxem” muxlislari, balki butun Angliya va musulmon yosh futbolchilar uchun yangi umid ramziga aylanmoqda.

Jahongir Boltaboyev