Сон Хён Мин “Тоттенхэм”дан кетишини эълон қилди

Жанубий кореялик ҳужумчи Сон Хён Мин Англиянинг “Тоттенхэм” клуби сафини тарк этишини эълон қилди. Бу ҳақда у бугун, 2 август куни эртанги “Ньюкасл”га қарши ўртоқлик учрашуви олдидан Сеулда ўтказилган матбуот анжуманида сўз очди.

“Матбуот анжуманини бошлашдан аввал ёзда клубни тарк этиш қарорини қабул қилганимни билдирмоқчиман. Клуб бу қарорни қабул қилишимда менга ҳурмат билан ёрдам бермоқда. Бу менинг фаолиятимдаги энг оғир қарор бўлди. Жуда кўплаб ажойиб хотиралар бор. Бундай қарор қабул қилиш жуда қийин бўлди. Ўзимни ривожлантиришни давом эттириш учун янги муҳит зарур. Бироз ўзгаришларга эҳтиёж бор. 10 йил – бу жуда катта муддат. Мен Шимолий Лондонга ёшлигимда – 23 ёшимда келган эдим. Энди эса бу клубни етукликка эришган, фахрли эркак сифатида тарк этяпман. “Тоттенхэм” мухлисларига берган муҳаббати учун миннатдорлик билдираман. Умид қиламанки, бу хайрлашув ўз вақтида рўй бермоқда ва ҳозир айнан шундай қарор учун тўғри пайт. Ҳамманинг буни тушуниб, ҳурмат билан қабул қилишига умид қиламан”, дейди Сон.

Шунингдек, у бу ҳақда жамоадошларига гапириш оғир бўлганини, чунки улар билан баъзида оила аъзоларидан ҳам кўпроқ вақт ўтказишини айтган.

“Мен бу қарорни анча олдин қабул қилганман. Сўнгги кунлар осон кечмади. Ташқаридан кўнглимни кўтариб юриш осон бўлмади, лекин клуб ёки жамоадошларимга зарар етказмаслик учун қўлимдан келганини қилдим. Гарчи қарор аллақачон қабул қилинган бўлса-да, қолган икки кун давомида мухлислар билан яхши хотираларни яратмоқчиман”, деди Сон. 

Маълумот учун, Сон 2015 йилдан бери “Тоттенхэм”да тўп суриб келаётганди ва бу давр мобайнида клуб билан фақат бир марта – жорий йилда Европа Лигасини ютди. Ўтган мавсумда Сон Англия Премер-лигасида 30 та ўйинда майдонга тушди ва “Тоттенхэм” сафида гол+пас кўрсаткичи бўйича энг яхши футболчига айланди – у жами 16 очко тўплади (7 та гол ва 9 та голли узатма).

Унга АҚШнинг “Лос-Анжелес” клуби расмий таклиф бергани ҳақида хабарлар бор. Лекин унинг “Тоттенхэм” билан амалдаги шартномаси тугашига ҳали бир йил бор.