Сон Хён Минни “шантаж” қилган аёл қамалди

Жанубий Корея миллий терма жамоа сардори ва “Лос-Анжелес” футболчиси Сон Хён Миндан фарзандига ҳомиладор эканини айтиб, пул талаб қилган жанубий кореялик аёл товламачиликда айбланиб, тўрт йиллик қамоқ жазосига ҳукм қилинди. Бу ҳақда  “Тhe Korea Times” нашри хабар берди.

Янг фамилияли 20 ёшлар атрофидаги аёл жорий йил бошида ҳомиладорлигини ошкор қилиш билан қўрқитиб, сукут сақлаши эвазига 300 миллион вон (тахминан 205 минг доллар) олган. Шундан кейин у яна 70 миллион вон ундиришга уринганликда айбланди. 40 ёшлар атрофидаги эркак эса у билан тил бириктирганликда айбдор деб топилди.

Сеул марказий округ суди Янгни тўрт йилга, унинг шеригини эса икки йилга озодликдан маҳрум этган. Суд қарорида қайд этилишича, судланувчилар футболчининг машҳурлигидан фойдаланиб, Сон Хён Минга катта руҳий зарар етказган. Суд, шунингдек, аёл ҳомила кимдан бўлгани ҳақида ҳеч қачон далил тақдим этмаганини ҳам таъкидлаган.

Сон Хён Мин вакиллари эса бу борада изоҳ бермаган. Жанубий Корея матбуотига кўра, футболчининг агентлиги аввалроқ Сон Хён Мин аёлни танишини, бироқ у ёлғон материаллар билан пул талаб қилганини билдирган.

Эслатиб ўтамиз, АҚШнинг “Лос-Анжелес” жамоаси футболчиси Сон Хён Мин 2026 йилги Жаҳон чемпионатига тайёргарлик доирасида MLS’даги мавсум оралиғидаги танаффус пайтида қисқа муддатли ижара асосида Европага қайтишни режалаштираётгани хабар қилинган эди.