Собиқ губернатор Трампни Волдемортга қиёслади

Нью-Жерси штатининг собиқ губернатори Крис Кристи АҚШнинг собиқ президенти Дональд Трампни “Гарри Поттер” асаридаги ёвуз қаҳрамон – Волдемортга қиёслади. Бу ҳақда у кеча, 6 декабрь куни “Newsnation” томонидан эфирга узатилган Республикачилар партиясидан президентликка номзодларнинг тўртинчи дебатида сўз очди.

Дебатда Кристи билан бирга Республикачилардан президентликка кўрсатилган номзодлар – Флорида губернатори Рон ДеСантис, бизнесмен Вивек Рамасвами ва АҚШнинг БМТдаги собиқ элчиси Никки Хейли иштирок этди. 

Сўровномаларга кўра, биринчиликни ҳеч кимга бермай келаётган Дональд Трамп эса бу гал ҳам дебатда қатнашмаган. 

“Бу ерга чиқишга журъат этмаган бешинчи одам сўровномада пешқадамлик қилмоқда. Айни вақтда бу учлик (Кристининг дебатдаги рақиблари) Волдеморт билан рақобатлашаётганга ўхшайди. Улар бу ҳақда гапиришни хоҳламайди ", дейди Нью-Жерсининг собиқ губернатори.

Кристи ўз нутқида Трампни диктатор ва безори, президент бўлишга нолойиқ одам деб атаган.

Шунингдек, у ҲАМАС томонидан гаровга олинган америкаликларни озод қилиш учун АҚШ Қуролли кучларини Фаластин-Исроил можаро ҳудудига юборишга тайёрлигини маълум қилди. 

"Агар менга уларни у ердан хавфсиз олиб чиқишимиз мумкинлигини исботловчи режа берилса, мен Америка армиясини одамларимизни олиб чиқиб, уйларига олиб келиш учун юборардим", деган у.

Дебатда қатнашган яна бир номзод ДеСантис эса Исроилнинг Ғазодаги амалиётини қўллаб-қувватлаб, Исроилни “АҚШнинг энг ишончли иттифоқчиси” деб атади.

У, шунингдек, ҳозирги маъмуриятни музлатилган Эрон пулларини "эритгани" учун танқид қилди. Унинг фикрича, Эрон ҳозирда бу активлардан ҲАМАСни қўллаб-қувватлаш учун фойдаланмоқда.

Флорида губернаторини АҚШнинг БМТдаги собиқ элчиси Никия Хейли ҳам қўллаб-қувватлади.

Маълумот учун, британиялик ёзувчи Ж.К. Роулингнинг сеҳргар Гарри Поттер ҳақидаги етти жилдли китоблари 1997 йилдан 2007 йилгача нашр этилган. 80 дан ортиқ тилда нашр этилган китобларнинг умумий тиражи 500 миллион нусхадан ошади. 2001 йилдан 2011 йилгача Роулингнинг етти асари асосида Гарри Поттер ва унинг дўстлари ҳақида саккизта фильм суратга олинган.