“Сиз президентим эмассиз”. Россиялик актёр Путинга кескин мурожаат йўллади (видео)

Сергей Безруков раҳбарлигидаги театр актёри Алексей Ярмушчик мамлакат Президенти Владимир Путинга мурожаат қилиб, уни ўз президенти деб ҳисобламаслигини айтди. Актёр бу ҳақдаги видео мурожаатини 28 июль куни Instagram’даги саҳифасида эълон қилди.

26 ёшли актёр эълон қилган видеомурожаатида Путиннинг президент бўлиб қолишини истамаслигини, ҳукумат тарқатиб юборилиши кераклигини ва Россиядаги мавжуд сиёсатни қўллаб-қувватламаслигини билдирган.

“Мен сизнинг менинг президентим бўлишингизни хоҳламайман. Бутун ҳукуматни тарқатиб юборинг”, деган актёр.

 У, шунингдек, Қримни Россияники деб ҳисобламаслигини, “ВКонтакте” эмас, Instagram’дан фойдаланишни хоҳлашини айтган.

“Мен сизнинг телевизорингизни кўришни хоҳламайман. Мен ўзимнинг қўшиқларимни тинглашни хоҳлайман. Мен VK’дан фойдаланишни истамайман. Мен Instagram’дан фойдаланишни истайман, чунки у яхшироқ. Мен Қрим бизники деб ҳисобламайман”, деб айтган у.

Ярмушчикнинг таъкидлашича, у ўз тенгдошлари орасида Путиндан қўрқмайдиган ёки унинг президент бўлишини хоҳлайдиган бирор кишини танимайди.

“Мен сиз менинг президентим бўлишингизни истамайман. Ҳеч қачон. Сизни президент сифатида яхши кўрадиган ва ҳурмат қиладиган одамлар қаердалигини билмайман. Сиз менинг президентим эмассиз. Сизга айтмоқчи бўлганларим шулардан иборат эди”, деган у мурожаатида.

Бир неча соатдан кейин актёр яна бир видео эълон қилиб, биринчи чиқиши ортидан турли фикрларни ўқиганини ва ҳукуматни қўллаб-қувватловчи инсонларнинг муносабати унда катта таассурот қолдирганини айган.

Унинг сўзларига кўра, айнан шу муҳокамалардан кейин мамлакат ҳукуматига ва Путинга муносабати маълум даражада ўзгарган.

“Мен бу халқни жуда яхши кўраман. Энди ҳукуматни ҳам яхши кўраман, Владимир Владимировични ҳам ҳурмат қиламан. Чунки ҳақиқатан ҳам уни қўллаб-қувватлайдиган одамлар бор экан. Энг муҳими – бир-биримиз билан мулоқот қилиш”, деган Ярмушчик.

“Осторожно, новости” нашрига берган интервьюсида у биринчи видеони “ахборот пуфагини ёриб чиқишга уриниш” деб атаган. Актёр оқибатлардан хавотирланаётганини яширмаган.

Унинг айтишича, мурожаатни ёзишига Россияда сафарбарликнинг янги тўлқини бошланиши мумкинлиги ҳақидаги миш-мишлар туртки бўлган.

“Мендек ёш йигит учун бу энг катта хавотирлардан бири”, деган у.

Маълумот учун, Алексей Ярмушчик 2023 йилда Константин Райкин номидаги Олий саҳна санъати мактабини тамомлаган. Кейин Сергей Безруков раҳбарлик қиладиган Москва вилояти драма театрида ишлаган. Нашр маълумотларига кўра, у 2026 йил июнь ойида маошнинг пастлиги ҳамда театрда актёрларга муносабатдан норози бўлгани учун ишдан бўшаган.

Ярмушчикнинг чиқиши сўнгги ойларда Путинга қаратилган шов-шувли мурожаатлардан яна бири бўлди. Бундан аввал блогер Виктория Боня ҳам президентга мурожаат қилиб, мамлакатдаги муаммолар ҳақида гапирган, Украинадаги уруш қатнашчиси Александр Лунин эса армиядаги вазият юзасидан Путин билан учрашишни талаб қилган эди. Кейинчалик Лунин маъмурий қамоққа олингач, мурожаатини ўчириб ташлаган ва аввалги баёнотларидан воз кечган.