Синнер тарихий натижа қайд этди

Кеча, 3 май куни эркаклар ўртасидаги яккалик баҳсларида дунёнинг биринчи рақамли теннисчиси Янник Синнер “Мадрид Мастерс” турнирида чемпионликни қўлга киритди. Шу тариқа Синнер теннис тарихида кетма-кет бешта ATP Мастерс турнирида ғалаба қозонган илк теннисчига айланди.

Ҳал қилувчи финал учрашувида 24 ёшлик Синнер германиялик Александр Зверевга қарши кортга чиқди. Аслида Зверев жаҳон рейтингида учинчи ўринни эгаллаб турибди, бироқ Карлос Алькараснинг мусобақадан чиқиб кетгани сабабли Мадрид турнирида иккинчи рақам остида иштирок этди.

Финал баҳси икки сетда якунланди. Синнер рақибини 6/1, 6/2 ҳисобида ишончли тарзда мағлуб этди. Учрашув атиги 58 дақиқа давом этди.

Шу тариқа, 24 ёшли италиялик теннисчи фаолиятида илк бор Мадрид турнирида ғолиб чиқди ва жаҳон рейтингидаги етакчилигини янада мустаҳкамлади. Зверев эса учинчи ўриндаги позициясини сақлаб қолди.

Шунингдек, Синнер теннис тарихида кетма-кет бешта ATP Мастерс турнирида ғалаба қозонган илк теннисчига айланди. У 2026 йилда Индиан-Уэллс, Майами, Монте-Карло ва Мадридда зафар қучди. Бундан ташқари, у ўтган мавсум якунидаги Париж мусобақасида ҳам ғолиб чиққан эди.

Маълумот учун, бунгача сербиялик Новак Жокович ва испаниялик Рафаэль Надаль кетма-кет тўрттадан Мастерс турнирида ғалаба қозонишга эришган.