Сиэтл 1 сентябрни “Ўзбекистон Мустақиллиги куни” деб эълон қилди

АҚШнинг йирик иқтисодий ва технологик марказларидан бири – Сиэтл шаҳри мэри Кети Б.Уилсон 2026 йил 1 сентябрни шаҳарда расман “Ўзбекистон Мустақиллиги куни” (Uzbekistan Independence Day) деб эълон қилди. Мазкур қарор Ўзбекистон Республикаси давлат мустақиллигининг 35 йиллиги муносабати билан қабул қилинган. Бу ҳақда QALAMPIR.UZ’га Ўзбекистоннинг Вашингтондаги бош консули Аҳрор Бурҳонов маълум қилди. 

Сиэтл мэри томонидан имзоланган расмий прокламацияда Ўзбекистоннинг 35 йил давомида суверенитет, тараққиёт ва кенг кўламли трансформация йўлини босиб ўтгани алоҳида таъкидланган.

Ҳужжатда, шунингдек, Ўзбекистоннинг Сиэтлда Бош консулхонаси фаолиятини йўлга қўйгани қайд этилиб, бунинг натижасида Сиэтл Ўзбекистоннинг бевосита дипломатик ваколатхонаси мавжуд бўлган АҚШнинг саноқли шаҳарларидан бирига айлангани эътироф этилган.

Прокламацияда Ўзбекистон Марказий Осиёнинг энг кўп аҳолига эга давлати ва минтақанинг жадал ривожланаётган иқтисодиётларидан бири экани, мамлакат очиқ бозорлар ва халқаро шерикликни кенгайтиришга интилаётгани қайд этилган.

Шунингдек, Ўзбекистоннинг қадимий Ипак йўли марказида жойлашгани ва бугунги кунда 100 миллиондан ортиқ истеъмолчига эга минтақага чиқиш имконини берувчи стратегик дарвоза сифатидаги ўрни таъкидланган. Сиэтлнинг дунёга машҳур бизнес ҳамжамияти билан савдо, инвестиция, логистика, технологиялар ва энергетика соҳаларида катта ҳамкорлик имкониятлари мавжудлиги алоҳида кўрсатиб ўтилган.

Сиэтл мэри Ўзбекистон Бош консулхонасининг фаолияти икки томон ўртасида узоқ муддатли инсонлараро, бизнес ва ҳукуматлараро алоқаларни мустаҳкамлашга хизмат қилишини қайд этган.

Ўзбекистоннинг Сиэтлдаги бош консули Ахрор Бурханов ушбу қарорни икки халқ ўртасидаги дўстлик ва тобора кенгайиб бораётган шерикликнинг муҳим рамзи сифатида баҳолаган.

“Сиэтл шаҳрининг Ўзбекистон Мустақиллигининг 35 йиллигига кўрсатаётган бундай юксак эътибори биз учун катта шараф. Бу қарор нафақат байрамимизга ҳурмат, балки Ўзбекистон ва АҚШнинг Тинч океани шимоли-ғарбий минтақаси ўртасида шаклланаётган янги ва истиқболли муносабатларнинг яққол ифодасидир. Сиэтлда Бош консулхонанинг очилиши билан биз бу дўстликни аниқ иқтисодий, технологик, таълимий ва маданий лойиҳаларга айлантиришни мақсад қилганмиз”.

Жорий йилнинг 4 сентябрь куни Сиэтлда Ўзбекистон Республикасининг АҚШ Ғарбий соҳилидаги биринчи Бош консулхонасининг расмий очилиш маросими бўлиб ўтади. Тадбир Ўзбекистон мустақиллигининг 35 йиллигига бағишланиб, унда Вашингтон штати ва Сиэтл шаҳри раҳбарияти, дипломатик корпус, етакчи АҚШ компаниялари, академик доиралар ва жамоатчилик вакиллари иштирок этиши кутилмоқда.

Сиэтл шаҳрининг мазкур тарихий қарори Ўзбекистон – АҚШ муносабатларининг ҳудудлараро даражада янги босқичга кўтарилаётганини ҳамда мамлакатнинг АҚШ Ғарбий соҳилидаги сиёсий, иқтисодий ва жамоатчилик алоқалари изчил кенгайиб бораётганини яна бир бор намоён этди.

Маълумот учун, Сиэтл АҚШнинг Тинч океани шимоли-ғарбий минтақасидаги энг йирик иқтисодий, технологик ва савдо марказларидан бири. Катта Сиэтл минтақаси 4,1 миллиондан зиёд, иқтисодиёти 2025 йилда қарийб 607 млрд АҚШ доллари ҳажмидаги ялпи ҳудудий маҳсулот яратган бўлиб, бу Вашингтон штати иқтисодиётининг асосий қисмини ташкил этади. 

Сиэтл ва унинг атрофидаги шаҳарларда дунёнинг энг йирик компанияларидан Amazon ва Starbucks бош қароргоҳлари Сиэтлда, Microsoft, Costco Wholesale, T-Mobile ва PACCAR жойлашган. Шунингдек, минтақада Boeing, Google, Meta, Expedia Group ва Alaska Airlines каби глобал компаниялар катта фаолият юритади. Катта Сиэтлдаги етакчи очиқ акциядорлик компанияларининг жами даромади 1,5 трлн доллардан ошган.

Эслатиб ўтамиз, аввалроқ АҚШ ва Канадада яшаётган 500 нафар ўзбекистонлик Президент Шавкат Мирзиёевга мурожаат йўллаб, Янги Ўзбекистондаги ўзгаришлар ва мамлакатнинг халқаро майдондаги нуфузи юксалаётганини алоҳида эътироф этганди.