Швейцарияда дунёдаги энг баланд 3D-принтерда ясалган бино очилди

Швейцариядаги “Tor Alva” (Оқ минора) номли бино дунёдаги энг баланд 3D-принтерда ясалган иншоот сифатида эътироф этилди. У Граубюнден кантонидаги Мулегнс шаҳрида жойлашган бўлиб, 2 500 та 3D босма қатламдан иборат. Бу ҳақда “Swissinfo” хабар берди.

Қайд этилишича, жорий йилнинг 20 май куни Швейцария Федерал Кенгаши аъзоси Ги Пармелен ушбу бинони расман очиб берган. Миноранинг баландлиги 30 метр бўлиб, бу 3D-принтерда чоп этилган иншоотлар орасида энг баланди. Пармелен бу лойиҳани “минтақа учун янги даврнинг бошланиши” деб атаган ва уни маъноси жиҳатидан Эйфель минорасига қиёслаган.

Цюрих Технология Олий мактаби мутахассислари томонидан лойиҳаланган миноранинг тузилиши 32 та 3D-принтерда чоп этилган устун асосида қурилган. Архитектор ва дизайнер Бенжамин Дилленбургернинг айтишича, ҳар бир устун 250 километрга тенг босма материалдан иборат бўлиб, бутун иншоот жами 2500 қатламдан ташкил топган.

Цюрих университети президенти Жером Мезо бу иншоотни Швейцариянинг муҳандислик ва илм-фандаги инновацион кучини ифодаловчи тимсол деб атаган. Унинг айтишича, бино қурилишида бетон 50 фоизга кам ишлатилган, бу эса келгусида уй ва иншоотлар қурилишида карбонат чиқиндиларини камайтиришга ёрдам беради.

Қайд этилишича, “Оқ минора” лойиҳаси тарихий маъно ҳам касб этади. У Граубюнден вилоятидан XV-XVIII асрларда очарчилик сабабли эмиграция қилган қандолатчилар хотирасига бағишланган. Минорадаги панжара шаклидаги дизайн ширин пирогларни эслатади. XX аср бошларида Мулегнс аҳолиси 150 киши бўлган бўлса, ҳозирда улар атиги 11 нафар. Шунинг учун маҳаллий аҳоли ушбу лойиҳа ёрдамида минтақага ташриф буюрувчилар оқими ошишига умид қилмоқда.

Бироқ лойиҳани амалга ошириш осон бўлмаган. Минора режалаштирилганидан икки йил кеч очилган ва кутилганидан икки баравар кўпроқ – 4,4 миллион Швейцария франкига тушган. Қурилишни ташкиллаштирган Origen Foundation директори Жованни Нетзернинг айтишича, асосий муаммолар технологик чекловлар, 3D қисмларни монтаж қилишдаги мураккабликлар ва 1 500 метр баландликдаги тоғли ҳудудда материалнинг реакцияси бўлган.

“Яхши томони шундаки, “Tor Alva” кўчма иншоот сифатида лойиҳалаштирилган. У Мулегнсда 5 йил давомида тургач, Граубюндендаги бошқа шаҳарларга кўчирилади. Ташкилотчилар маълумотига кўра, бешта шаҳар аллақачон қизиқиш билдирган”, дейилади хабарда.