Шотландиядаги оролда 34 йилдан кейин илк бор чақалоқ туғилди

Шотландиянинг чекка Шимолий Роналдсей оролида 34 йил ичида илк бор чақалоқ дунёга келди. Бу ҳақда CNN хабар берди.

Қайд этилишича, Дункан Уайлдер Торстейн Трейлл Суарес Форд исмли чақалоқ жорий йилнинг 15 сентябрь куни туғилган. Унинг онаси Элис Трейлл Форднинг айтишича, бу Шимолий Роналдсей оролида 34 йил ичида қайд этилган илк туғилиш ҳисобланади.

Шимолий Роналдсей Оркней архипелагининг энг шимолий ороли бўлиб, узунлиги қарийб 5 километр, эни эса 3 километрни ташкил қилади. 2024 йилдаги Шотландия ҳукумати маълумотларига кўра, оролда 72 киши яшаган. Ҳозир эса Элис Трейлл Форднинг айтишича, орол аҳолиси 51 кишини ташкил этади.

Элис Трейлл Форд ва унинг бўлажак турмуш ўртоғи Хорхе Суарес оиласи билан Коста-Рика ва Шимолий Роналдсей ўртасида яшаб келади. Дастлаб фарзандини Коста-Рикада дунёга келтиришни режалаштирган. Бироқ оролга келганидан кейин туғруқ режасини ўзгартирган.

“Мен шу заҳоти бу фарзандим учун энг ўзига хос, сеҳрли ва илиқ муҳитдаги туғруқ бўлишини ҳис қилдим”, дейди Трейлл Форд.

У фарзандини аждодлари томонидан қурилган Ҳолланд уйи биносида дунёга келтирган. Унинг сўзларига кўра, оиласи 1727 йилдан бери орол билан боғлиқ ва у ҳар йили гўдаклигидан буён Шимолий Роналдсейга қайтиб келади.

“Бу орол менинг улғайишимда катта ўрин тутган. Шунинг учун аждодларим яшаган шу масканда ўзимни жуда яқин ва ўзимга тегишлидек ҳис қилдим”, дейди у.

Чақалоқ туғилгани орол аҳолисини ҳам хурсанд қилган. Трейлл Форд маҳаллий аҳолига омад рамзи сифатида тўрт баргли беда ва “groatie buckies” деб аталадиган кичик чиғаноқлар билан безатилган виски идишчаларини тарқатган.

Трейлл Форднинг фикрича, оролда узоқ вақт давомида болалар туғилмаганига тиббий хизматларнинг чеклангани сабаб бўлиши мумкин. Шимолий Роналдсейда шифокор ёки шифохона йўқ, фақат доимий ҳамшира фаолият юритади.

Унинг айтишича, оролдан Оркней материagидаги Киркуолл шаҳрига қайиқда етиб бориш тахминан 2 соат 40 дақиқа вақт олади. Фавқулодда вазият юзага келганида эса соҳил қўриқлаш хизмати вертолёти чақирилиши мумкин.

Эслатиб ўтамиз, аввалроқ Жанубий Кореянинг кичик бир шаҳарчасида сўнгги 17 йил ичида биринчи марта бола туғилгани ҳақида хабар берилган эди.