Шольц Байден, Макрон ва Стармер билан келишгач, Путинга қўнғироқ қилган – “Bild”

Германия канцлери Олаф Шольц Россия Президенти Владимир Путинга қўнғироқ қилиш режаларини 18 октябрь куни АҚШ ва Франция Президентлари Жо Байден ва Эммануэль Макрон ҳамда Буюк Британия Бош вазири Кир Стармер билан тўрт томонлама форматда муҳокама қилган. Бу ҳақда “Bild” газетаси хабар берди.

Кейин Берлинда тўрт давлат етакчилари учрашганди.  

Газетанинг ёзишича, Шольцнинг Путин билан суҳбатидан кўзланган мақсад Россия раҳбарининг Украина бўйича музокараларга тайёр ёки тайёр эмаслигини тушуниш бўлган.

Шу билан бирга, канцлер немис тилида гапирган, шунинг учун Россия раҳбари таржимонга муҳтож бўлмаган. Бироқ Путин, “Bild” нашрининг ёзишича, рус тилида жавоб берган. Шольц эса, Ангела Меркелдан фарқли ўлароқ, рус тилини билмаслиги сабабли, Президентнинг сўзлари унга таржима қилинган.

Эслатиб ўтамиз, Олаф Шольц ARD телеканалига берган интервьюсида Россия Президенти Владимир Путин билан телефон орқали мулоқот ўтказиш ниятини тасдиқлаган, бироқ бу ишни шериклари билан келишувсиз амалга ошириш ниятида эмаслигини айтганди. Кеча, 15 ноябрь куни Шольц ва Путин 2022 йил охиридан буён биринчи бор телефон орқали мулоқот қилди. Суҳбатда улар Россия-Украина урушини муҳокама қилди.