Шоҳжаҳон Эргашев ҳаммани алдаяптими?

Мана бир неча йилдирки ўзбекистонлик профессионал боксчи Шоҳжаҳон Эргашев Халқаро бокс федерацияси (IBF) камари учун жанг қиламан, деб келади, лекин чемпионлик жанги ҳалиям ўтказилмади. Баъзилар Эргашев мухлисларни алдаб келмоқда деса, баъзилар IBF ўзбекистонлик боксчига камар учун жанг беришни пайсалга соляпти демоқда. Юқоридаги ҳолатларга ойдинлик киритиш мақсадида QALAMPIR.UZ Шоҳжаҳон Эргашевнинг промоутери “Salita Promotions” президенти Дмитрий Салита билан суҳбат қилишга қарор қилди.

Салитанинг айтишича, июль ойида Эргашев IBF камари учун мажбурий даъвогар деб эълон қилинади ва у тез орада чемпионлик жангида қатнашади.

Дмитрий Салита ўзбекистонлик боксчига юксак даражада ишонч билдиришини, келгусида у жаҳоннинг энг номдор боксчиларидан бирига айланишини маълум қилди.

Таъкидлаш жоиз, Эргашев IBF камарини қўлга киритгач, профессионал фаолиятини якунламоқчи. Салитанинг айтишича, ўзбекистонлик боксчи чемпионлик жангида ғолиб бўлса, кейинчалик у камар учун ҳимоя жангларини ҳам ўтказиши керак. 

Маълумки, Бутунжаҳон бокс ташкилоти (WBO) чемпионлик камари соҳиби америкалик Теофимо Лопес профессионал фаолиятини якунлади. Шоҳжаҳон Эргашев ушбу йўналиш рейтингининг 4-поғонасида бормоқда. 

Хўш, Салита Эргашевга WBO камари учун жанг ташкил қилиб бера оладими?

"Мен WBO билан гаплашдим. Шоҳжаҳон WBO камарига анча яқин номзод. Унинг 4-ўриндалиги кўп нарсани англатмайди. Қайси йўл Шоҳжаҳон учун жаҳон чемпиони номини олишда энг яхши йўналиш эканлигини баҳолаб олишимиз керак. Вазиятни кузатишда давом этамиз. Шоҳжаҳон бу каби марраларни забт эта олади. Фикримча, у бугунги кунда дунёдаги энг кучли зарбага эга спортчилардан бири. Унинг ортида Ўзбекистон турибди. У чемпион бўлиши билан, албатта, дунёнинг энг кўзга кўринган боксчиси сифатида тан олинади. Чемпионликка жуда оз қолди. Бу кичик шаҳарчадан Қўшма Штатларга келган ва ўз устида тинмай ишлаган, дунёнинг энг йирик ареналарида жанг қилган Шоҳжаҳон Эргашевнинг ажойиб ҳикояси бўлади. Қўшма Штатлардаги одамлар Шоҳжаҳонни жуда яхши кўради. Аминманки, у келажакнинг супер юлдузи бўла олади”, дейди Дмитрий Салита.

Ўзбекистонда Шоҳжаҳон Эргашев ва Шаҳрам Ғиёсовнинг эҳтимолий жангига қизиқиш жуда баланд. “Salita Promotions” ушбу жангни Ўзбекистонда ташкил қила оладими? 

"Аслида бу маҳаллий савол. Бу жанг халқаро аҳамиятга эга эмас. Мен қачонки бир боксчи билан ҳамкорликни бошласам, уни жаҳон чемпиони қилишни ўз олдимга мақсад қиламан. Тўғрисини айтсам, мен сиз ҳозир таъкидлаб ўтган боксчини танимайман, агар у дунё миқёсидаги жангчи бўлса ва албатта, унга АҚШ телевидениеси қизиқиш билдирса, биз бу жангни ташкил эта оламиз", дейди "Салита Промотионс" президенти.

Хулоса қилишимиз мумкинки, Салитанинг айтишича, Эргашев тез орада IBF камари учун жанг қилади. Шунингдек, QALAMPIR.UZ Эргашевнинг америкалик суперюлдуз Райан Гарсияга қарши жанг ўтказиши бўйича саволларга ҳам аниқлик киритди.