Сентябрь ойида мол гўшти 3,1 фоизга қимматлади

Ўзбекистонда 2024 йил сентябрь ойи якунларига кўра, инфляция 1,23 фоиз даражасида қайд этилди. Бу ҳақда Статистика агентлиги маълум қилди.

Билдирилишича, йиллик инфляция (2023 йил сентябридан) деярли ўзгармади — 10,46 фоиз (бир ой аввал 10,47 фоиз эди), йил бошидан (январь-сентябрь) эса нархлар ўртача 6,77 фоизга ошган.

Озиқ-овқат маҳсулотлари нархлари ўтган ойда ўртача 1,4 фоизга ошган (йиллик ҳисобда — 2,4 фоизга ўсиш). Ноозиқ-овқат маҳсулотлари нархи 0,8 фоизга (8,4 фоиз), пулли хизматлар нархи 1,5 фоизга (28,7 фоиз) ошган.

Гўшт нархи юқори суръатларда ўсишда давом этмоқда: мол гўшти — 3,1 фоизга (август ойида — 5,3 фоиз), қўй гўшти — 2,8 фоизга (август ойида — 4,9 фоиз) қимматлаган. Йил бошидан буён мол гўшти нархи 11,3 фоизга, қўй гўшти нархи эса 11,9 фоизга ошган.

Дори-дармонлар ҳам нархи юқорилаётган маҳсулотлар қаторидан ўрин олган, хусусан, сентябрь ойида у 1,2−1,9 фоиз (йил бошидан — 24,7 фоиз) оралиғида ошган.

Статистика агентлиги маълумотларига кўра, метан гази ойига 0,5 фоизга (йил давомида – 35,8 фоизга), бензин – 0,2-2,4 фоиз оралиғида ёки ўртача 0,8 фоизга (+13,8 фоиз) қимматлаган.