Сенегал кубок ва медалларни беришдан бош тортмоқда

Сенегал Африка кубоги ғолиблиги бекор қилингач, кубокни ва медалларни қайтариб беришдан бош тортмоқда. Бу ҳақда “Daily Mail” нашри хабар берди.

Кеча, 17 март куни Африка футбол конфедерацияси (CAF) мисли кўрилмаган қарор қабул қилиб, Африка кубоги финал натижасини ўзгартирди ва орадан 58 кун ўтгандан сўнг Сенегалга техник мағлубият ёзган ҳолда чемпионлик Марокашга берилди.

“Бу қарор адолатсиз, мисли кўрилмаган ва қабул қилиб бўлмайдиган ҳолат бўлиб, Африка футболи обрўсига путур етказади. Ўз ҳуқуқларимизни ҳимоя қилиш учун тез орада Лозаннадаги Спорт арбитраж судига мурожаат қиламиз”, дея баёнот берди Сенегал футбол федерацияси.

Федерация бош котиби Абдулайе Соу ҳам кубок мамлакатда қолишини таъкидлади. 

“Жанг ҳали тугамади. Сенегал ҳақли ва ғалаба биз томонда. Кубок ҳеч қаерга кетмайди”, дейди у.

Финалдан кейин Марокаш футбол федерациясининг шикоятидан сўнг CAF текширув ўтказиб, Сенегал жамоаси регламентнинг 82-моддасини бузганини, яъни ўйин якунланмасдан майдонни тарк этганини асос сифатида келтирди.

Шунингдек, қарорга футболчилар ҳам кескин муносабат билдирди. Улар ижтимоий тармоқларда кубок билан тушган суратларини улашиб, ўзларини ҳақиқий чемпион деб ҳисоблашларини таъкидлади.

Маълумот учун, Работда бўлиб ўтган финалнинг 98-дақиқасида юзага келган баҳсли пенальти ортидан сенегаллик футболчилар тахминан 15–20 дақиқа майдондан тарк этган. Кейинчалик сардор Садио Мане уларни қайтишга кўндирганди. Пенальтидан Марокаш унумли фойдалана олмаган. Қўшимча вақтда эса Папе Гуэйе ғалаба голини уриб, Сенегалга чемпионликни олиб келган эди, бироқ CAF қарори билан натижа ўзгартирилди.