Саудия Россия-Украина ўртасида тинчлик музокараларини ўтказишга тайёрлигини билдирди

Саудия Арабистони Россия-Украина ўртасидаги урушни тугатиш бўйича тинчлик музокараларига мезбонлик қилишга рози. Бу ҳақда кеча, 14 февраль куни мамлакат Ташқи ишлар вазирлигининг Х ижтимоий тармоғида эълон қилинган баёнотида сўз боради.

Вазирликнинг хабарига кўра, Саудия тинчлик музокаралари ушбу мамлакатда бўлишини олқишлайди.

“Қироллик бу саммитни ўз ҳудудида ўтказиш таклифини мамнуният билан қабул қилади ҳамда Россия ва Украина ўртасида узоқ муддатли тинчликка эришиш йўлидаги доимий саъй-ҳаракатларини тасдиқлайди”, дейилади баёнотда.

Шунингдек, вазирлик Ар-Риёд АҚШ ва Россия Президентлари Дональд Трамп ва Владимир Путин ўртасида 2025 йил 12 февралда бўлиб ўтган телефон суҳбатини ва Трампнинг учрашувни Саудия Арабистонида ўтказиш ҳақидаги баёнотини юқори даражада санашини ҳам қўшимча қилган.

Қолаверса, Саудия Украина бўйича тинчликка эришиш учун уруш бошлангандан бери ҳаракат қилиб келаётганини ҳам айтиб ўтган.

“2022 йил 3 март куни Саудия Арабистони валиаҳд шаҳзодаси ва Бош вазири Муҳаммад бин Салмон бин Абдулазиз Россия Президенти Владимир Путин ва Украина Президенти Владимир Зеленский билан телефон орқали суҳбатда Қиролликнинг ушбу инқирозни сиёсий йўл билан ҳал этишга ёрдам беришга тайёр эканлигини билдирган эди”, дейилади баёнот матнида.

Эслатиб ўтамиз, 12 февраль куни АҚШ Президенти Дональд Трамп телефон орқали суҳбат чоғида Россия Президенти Владимир Путин билан Саудия Арабистонида учрашув ўтказмоқчи эканини маълум қилганди. Шунингдек, у ўз ёрдамчиларига шахсий учрашувга тайёргарлик кўриш бўйича зудлик билан кўрсатма беришга келишиб олган. Ушбу хабардан сўнг, журналистлар Саудия Арабистонининг расмий манбалари билан боғланган. Подшоҳлик эса ушбу саммитга тайёргарлик ҳали бошланмаганини билдирганди.