Трамп Путин билан эҳтимолий учрашув жойини айтди

north_east

Трамп Путиндан кейин Зеленскийга ҳам сим қоқди

АҚШ Президенти Дональд Трамп Россия Президенти Владимир Путин билан Саудия Арабистонида учрашув ўтказмоқчи эканини маълум қилди. Бу ҳақда у кеча, 12 февраль куни Оқ уйда журналистлар билан суҳбатда сўз очди.

Трампнинг сўзларига кўра, ушбу учрашувдан сўнг яна бири бўлиши мумкин. У Путиннинг АҚШга ташрифини кутаётганини ва ўзи ҳам Россияга боришни режалаштираётганини ҳам билдирди. Шунингдек, Дональд Трампнинг қайд этишича, у Путин билан телефон орқали тез-тез мулоқот қилишни режалаштирмоқда.

“Мен Президент Путин билан асосан телефон орқали мулоқот қиламан, бироқ охир-оқибат биз юзма-юз учрашишни ҳам кутмоқдамиз. Аслида биз унинг бу ерга келишини, мен эса у ерга боришим кутилмоқда. Бундан ташқари, бизнинг биринчи учрашувимиз, эҳтимол, Саудия Арабистонида бўлиб ўтади”, деди Трамп.

Эслатиб ўтамиз, аввалроқ Владимир Путин ва Дональд Трамп ўртасида телефон суҳбати бўлиб ўтгани хабар қилинганди. Суҳбат бир ярим соат давом этган. Асосан Украина можаросини тартибга солишнинг мумкин бўлган вариантлари муҳокама қилинган. Трампнинг сўзларига кўра, суҳбат якунида Президентлар “ўзаро ташрифларни ҳам ўз ичига олган ҳолда жуда яқин ҳамкорлик қилиш” борасида келишиб олган. Владимир Путин америкалик ҳамкасбини Москвага таклиф қилган, Трамп эса россиялик президентни АҚШга чорлаган.