Самарқандда сифатсиз қурилаётган объектлардаги камчиликлар очиқланди

Самарқанд вилоятида қурилаётган бир нечта объектларда қурилиш ишлари сифатсиз, меъёр-қоидаларга риоя қилинмаган ҳолда олиб борилаётгани аниқланди. Бу ҳақда Самарқанд вилояти қурилиш ва уй-жой коммунал хўжалиги соҳасида ҳудудий назорат қилиш инспекцияси Матбуот хизмати раҳбари Сарвар Бобоназаров QALAMPIR.UZ'га маълум қилди.

Унинг сўзларига кўра, дастлабки ҳолатда Пайариқ тумани 34-сонли умумтаълим мактабининг қўшимча 180 ўринли янги ўқув биноси қурилиши давомида меъёрларга амал қилинмагани аниқланган. Шунингдек, қурилиш майдони белгиланган тартибда ўралмаган. Бино пойдеворининг шамоллатиш туйнуклари лойиҳада диаметри 150 миллиметр бўлиши кўрсатилган, бироқ қурувчи томонидан 50 миллиметр ўлчамда туйнук қолдирилган. Бино деворларига терилган ғиштларнинг айримларига цемент-қум қоришмаси тўлдирилмаган.

Шунингдек, инспекция ходимлари туманнинг “Накурт” маҳалласи ҳудудида “Бошмоқ” оилавий шифокорлик пунктининг қурилиш биносида назорат қилганда ушбу объектда ҳам бир нечта қурилиш талаблари бузилаётгани аниқланган.

Бундан ташқари, туманнинг “Каттасайдов” маҳалласида қурилаётган мактабгача таълим ташкилоти биносидан ҳам қатор камчиликлар аниқланган. Бино пойдеворининг ташқи ҳимоя қисмига лойиҳада кўрсатилган қурилиш материаллари эмас, балки сифатсиз материаллардан фойдаланилган.

“Бинонинг ташқи ҳимоя қисмига базалтдан фойдаланиш кўрсатилган, лекин жойида пенопластдан фойдаланилган. Умуман олганда, юқоридаги объектларда техник ва муаллифлик назорати ўз вақтида юритилмаган. Объект паспортлари мавжуд эмас, ёки кўринарли жойга илинмаган”, дейди Самарқанд вилояти қурилиш назорати инспекцияси матбуот хизмати раҳбари.

Шу билан бирга, Иштихон туманида қурилаётган сув иншооти ҳам кўздан кечирилганда ётқизилаётган қувур ўлчаб кўрилган. Мазкур ўрнатилган қувур лойиҳада кўрсатилган нуқтага нисбатан паст бўлиб чиққан. Қурилиш ташкилотларига йўл қўйилган камчиликларни белгиланган муддатда бартараф этиш бўйича тегишли кўрсатмалар берилган. Кўрсатмалар ўз вақтида бажарилмаса, қурилиш корхоналарига нисбатан қонуний чоралар кўрилади.