“Samarqand no‘xat sho‘ragi” ham patentlandi

“Samarqand no‘xat sho‘ragi” ham geografik ko‘rsatkich sifatida davlat ro‘yxatidan o‘tkazildi. Bu haqda Samarqand viloyati hokimligi matbuot xizmati xabar berdi.

Bildirilishicha, Adliya vazirligi tomonidan Samarqand viloyati hokimi vazifasini bajaruvchi Adiz Boboyevga “Samarqand no‘xat sho‘ragi” geografik ko‘rsatkich sifatida  davlat ro‘yxatidan o‘tkazilgani to‘g‘risidagi hujjat topshirilgan.

Ma’lumot uchun, geografik ko‘rsatkich – bu mahsulotning ma’lum hududga xosligi va uning sifati, mashhurligi yoki boshqa belgilari o‘sha hududning tabiiy, insoniy va tarixiy omillariga chambarchas bog‘liq bo‘lganini ifodalovchi intellektual mulk ob’ekti hisoblanadi.

Eslatib o‘tamiz, 2023 yil 24 avgust kuni “G‘ijduvon shashlik”, 2024 yil 8 yanvar kuni esa “G‘uzor tandir go‘shti”, joriy yil 4 fevral kuni dunyoga mashhur “Samarqand noni” va iyun oyida “Xorazm tuxumbaragi”, “Andijon do‘ppisi” hamda “So‘qoq somsasi” geografik ko‘rsatkich sifatida O‘zbekiston Respublikasi Adliya vazirligi tomonidan davlat ro‘yxatidan o‘tkazilgandi.