Россиянинг Европага нисбатан тажовузкор нияти йўқ – Путин

Россия Президенти Владимир Путин мамлакатнинг НАТО билан урушга кириши ҳақидаги қўрқувни “бемаънилик” деб атади. Бу ҳақда у Тверь вилоятига ташрифи чоғида сўз очди.

Путиннинг сўзларига кўра, 2022 йилда АҚШ ҳарбий харажатлари 811 миллиард долларни, Россияники эса 72 миллиард долларни ташкил қилган.

"Биз бу нисбатни ҳисобга олиб, НАТО билан жанг қилмоқчимизми? Бу шунчаки сафсата. Уларнинг Украинадан кейин Европага ҳужум қилишимиз ҳақида гапираётганлари мутлақо бемаънилик, бу аҳолидан фақат пул ундириш учун қўрқитиш", дейди Россия раҳбари.

Путиннинг айтишича, агар урушда қатнашиш учун Украинага топширилган Американинг F-16 қирувчи самолётлари учинчи давлатлар аэродромларидан учиб чиқса, бу аэродромлар Россия ҳарбийлари учун қонуний нишонга айланади.

Шу билан бирга, Путин F-16 самолётлари бортида ядро қуролини олиб юриши мумкинлигини эслатган.

"Биз буни ҳам ҳисобга олишимиз керак", дейди у.

Маълумот ўрнида, Россиядан Шимолий Атлантика иттифоқи мамлакатларига таҳдид солаётгани ҳақидаги баёнотлар Ғарбда бир неча бор эшитилган. Хусусан, АҚШ Президенти Жо Байден 2023 йил декабрида бу ҳақда баёнот берган эди.

Бундан ташқари, 2024 йил январида НАТО ҳарбий қўмитаси раҳбари адмирал Роб Бауэр Шимолий Атлантика альянсига кирувчи давлатлар Россия билан кенг кўламли урушга тайёр бўлиши кераклигини айтган эди.