Россиянинг дон ва шакар экспортига тақиқи Ўзбекистонга таъсир қиладими? Вазирлик жавоб берди

Жамият 14516
image

Россия Федерациясининг буғдой ва шакар экспортига киритган чекловлари Ўзбекистонда мазкур маҳсулотлар ҳажмига таъсир кўрсатмайди. Бу ҳақда Қишлоқ хўжалиги вазирлиги баёнотида айтиб ўтилган.

Қайд этилишича, жорий йилда аҳолини буғдой ва ун маҳсулотлари билан барқарор таъминлаш мақсадида Ўзбекистонда 1 млн 27 минг гектар ер майдонида буғдой экилган, натижада жорий йилнинг июнь-июль ойларида 7 млн 679 минг тонна ҳосил етиштириш режалаштирилган. Бу кўрсаткич ўтган йилга нисбатан 1 миллион тоннага кўп.

Шунингдек, 2021 йил буғдой ҳосилида 6 млн 656 минг тонна буғдой етиштирилган бўлиб, шундан 2 млн 533 минг тоннаси республика дон захиралари учун “Ўздонмахсулот” АЖ ҳудудий корхоналарида жамғарилган, 4 млн 123 минг тоннаси фермер ва аҳоли ихтиёрида қолган.

Ўтган йил якунига қадар 2 млн 771 минг тонна буғдой дони ва 357,7 минг тонна ун хусусий сектор томонидан асосан Қозоғистон Республикасидан импорт қилинган ҳамда 26,8 минг тонна буғдой дони (Тожикистон Республикасига 94% ва Қирғизистон Республикасига 6%) ва 949,1 минг тонна ун (1 млн 265 минг тонна буғдой ҳисобида) Афғонистон Ислом Республикасига экспорт учун йўналтирилган.

2022 йилда аҳолини шакар маҳсулотлари билан кафолатли таъминлаш мақсадида Ўзбекистонда 600 минг тонна маҳсулот ишлаб чиқариш режалаштирилган.

Шунингдек, 2021 йилда 595,5 минг тонна шакар (2020 йилга нисбатан 315,1%) “Ангрен шакар” МЧЖ ва “Хоразм шакар” МЧЖ корхоналари томонидан ишлаб чиқарилган. Мазкур корхоналар томонидан 2021 йил ва 2022 йил январь-февраль ойларида товар хомашё биржасига аҳоли эҳтиёжини қоплаш мақсадида ҳар ойда 30 минг тоннадан кам бўлмаган миқдорда шакар савдога қўйилган.

Ўтган йил якунига қадар 23 минг тонна шакар (ўтган даврга нисбатан 344 минг тоннага камайган) ва 620 минг тонна шакар хомашёси (ўтган даврга нисбатан 423 минг тоннага ошган) Бразилиядан импорт қилинган ва 25 тонна шакар Афғонистон Ислом Республикасига экспортга йўналтирилган. 

2022 йил март-май ойларида таъминотчилардан яна қарийб 180 минг тонна хомашё етиб келади. Бундан ташқари жорий йил июнь-октябрь ойларида 200 минг тонна шакар хомашёси олиб келиш режалаштирилган.

“Юқоридагилардан келиб чиққан ҳолда, республикада аҳоли ва корхоналарнинг талабини узлуксиз, етарли миқдорда ва барқарор нархларда буғдой, ун, шакар маҳсулотлари билан таъминлаш ҳамда ички бозорларда нархларнинг кескин ўзгаришининг олдини олиш тўлиқ таъминланган”, дейилади вазирлик баёнотида.

Аввалроқ Россия Федерацияси Евроосиё иқтисодий иттифоқига аъзо давлатларга дон ва учинчи давлатларга шакар экспортини вақтинча тўхтатгани ҳақида хабар берган эдик.

Суннатилла Абдуллаев
Мақолага баҳо беринг
Баҳолаганлар: 310
Рейтинг: 3
t
×