Ҳамма тонналаб шакар еяпти – Сурхондарё вилояти ҳокими (видео)

Сурхондарё вилояти ҳокими Улуғбек Қосимов одамлар тонналаб шакар еётганини танқид қилиб, ҳаммани кўпроқ асал ейишга чақирди. Бу ҳақда у жорий йилнинг 11 апрель куни мактабгача таълим муассасалари, шифохоналар, спортчилар ва ҳарбий қисмларга озиқ-овқат етказиб берувчи корхоналар фаолияти бўйича ўтказилган йиғилишда гапирган. 

“Кеча олимни олиб келиб, шакарнинг зарарини ўргаттирдим. Ҳамма тонналаб шакар еяпти. Биз ҳозир 1000 тонна шакарнинг Сурхондарёдаги импортини қисқартирсак, шакарнинг бозордаги нархи арзон бўлади. Нима учун 3000 тонна асал ишлаб чиқаряпмиз? Нимага асал емаймиз биз?”, деган ҳоким.

Улуғбек Қосимовнинг ушбу гаплари ижтимоий тармоқларда муҳокамаларга сабаб бўлгач, ҳокимлик матбуот котиби Муродбек Давлатов муносабат билдирди. Унга кўра, ҳокимнинг гаплари умумий контекстдан кесиб олиниб, нотўғри талқин қилинмоқда.

“Мактабгача таълим муассасалари, шифохоналар, спортчилар ва ҳарбий қисмларга озиқ-овқат етказиб берувчи корхоналар фаолияти муҳокама қилинган йиғилишда вилоят ҳокими томонидан масъуллар ва таъминотчи корхоналар раҳбарларига шакар ўрнига табиий асал ва мевалардан олинган маҳсулотлардан кенгроқ фойдаланиш бўйича берилган тавсиялар нотўғри талқин қилинган ҳолда тарқатилмоқда”, дейди Муродбек Давлатов.

Бироқ тармоқларда асал шакардан қимматлиги, хусусан, 1 кг асал пулига 8-10 кг шакар бериши билдирилмоқда.

Вилоят ҳокимлиги матбуот котиби эса айрим канал ва саҳифа админларидан маълумотларни умумий мазмундан узиб олиб, нотўғри талқин қилган ҳолда тарқатмасликни сўрамоқда.

Эслатиб ўтамиз, аввалроқ Сурхондарё вилоятининг Қумқўрғон тумани ҳокими Анвар Нормаматов газнинг “таги йўқлиги” учун тезак ёқиш кераклигини айтган эди.