Россияда ўзбекистонликларни сохта рўйхатга қўйган аёл ушланди

Россиянинг Тверь вилояти Удомля шаҳрида 63 ёшли аёлга мигрантларни ўз уйига сохта рўйхатга қўйгани учун жиноий иш қўзғатилди. Бу ҳақда “Комсомольская правда” хабар берди.

Полиция маълумотларига кўра, у тўрт нафар Ўзбекистон фуқаросини ўз уйига сохта рўйхатга қўйиш эвазига пул олган. Текшириш чоғида маълум бўлишича, рўйхатга олинган фуқаролар аслида унинг уйида яшамаган. Терговчилар унинг хатти-ҳаракатларида Россия Федерацияси Жиноят кодексининг 322.3-моддаси – чет эл фуқаросини сохта рўйхатга қўйиш бўйича жиноят мавжудлигини аниқлаган.

“Аёлни беш йилгача озодликдан маҳрум қилиш тарзидаги жиноий жазо кутмоқда”, дейилади хабарда.

Эслатиб ўтамиз, аввалроқ Россиянинг Санкт-Петербург шаҳри Киров туманида ўзбекистонлик эркак 15 килограмм “гашиш” билан қўлга олинганди.