Россияда ўзбекистонлик эркак 11 ойлик чақалоқни қутқариб қолди (видео)

Россиянинг Москва вилоятида ўзбекистонлик эркак йўлда ётган 11 ойлик қизалоқни автомобиллар остида қолишдан қутқариб қолди. Бу ҳақда REN TV хабар берди.

Маълум бўлишича, дастлаб эркак йўлида қуён ёки мушук пайдо бўлди деб ўйлаб, уни четлаб ўтишга ҳаракат қилган. Кейин эса олдида 11 ойлик қизалоқ ётганини тушуниб етган.

“У қаттиқ йиғлаётган эди. Бола совуқдан музлаб қолган: бармоқлари, юзи – ҳаммасини совуқ урганди”, дейди халоскор.

Шундан сўнг у машина печини ёқиб, чақалоқнинг қўлларини ишқалаб иситишга ҳаракат қилган. Кейин эса полиция ва тез ёрдамни чақирган. Бир пайт у томон бир аёл келиб, қизалоқ унинг набираси эканини айтган. Бироқ ҳайдовчи бунга ишонмай, ҳуқуқ-тартибот идоралари ва шифокорлар келишини кутишга қарор қилган. Кейинчалик аёл ҳақиқатан ҳам қизалоқнинг қариндоши экани аниқланган. Эркакнинг сўзларига кўра, у яқинда психиатрия бўлимида даволанишни якунлаган.

Қайд этилишича, совуқдан азият чеккан чақалоққа биринчи даражали совуқ уриш ташхиси қўйилган, ҳозирда у уйда амбулатор даволанмоқда. Қизалоқнинг ота-онаси ҳайдовчига қутқарув учун пул таклиф қилган, бироқ у рад этиб, маблағни болани даволашга сарфлашларини сўраган.

Эслатиб ўтамиз, ўтган йили 7 йилдан бери Россиянинг Санкт-Петербург шаҳрида яшаб, фаррошлик қиладиган ўзбекистонлик мигрант ёнғин пайтида бир нечта аёлларни қутқариб, қаҳрамонга айланган эди. Шундан сўнг шаҳар аҳолиси ўзбекистонлик Олимжон Иброҳимовга 36 минг рубль йиғиб берган. Хусусан, “Черный список Питер” гуруҳи аъзолари Олимжон Иброҳимовга 11 минг рубль берган, яна 25 минг рублни Коломна (ёнғин содир бўлган жойдан унча узоқ бўлмаган Адмиралтей туманидаги тарихий округ) аҳолиси йиғиб берган.