Россияда мигрантларга қўшимча божлар жорий этилади

Россия Давлат Думасида бу ҳафта мигрантлар учун янги давлат божлари жорий этишга оид қонун лойиҳалари кўриб чиқилади. Бу ҳақда Дума раиси Вячеслав Володин ўзининг Telegram-каналида хабар берди.

Янги тартибга кўра, чет эллик фуқаролар ёки фуқаролиги бўлмаган шахсларга патент бериш ёки уни қайта расмийлаштириш учун 4200 рубль, меҳнат рухсатномасини узайтириш учун яна 4200 рубль, патент ёки рухсатнома нусхасини бериш ва унга ўзгартириш киритиш учун эса 2100 рубль бож тўлаш таклиф қилинмоқда.

Володиннинг айтишича, чет эл фуқароларининг аксарияти Россияга пул топиш учун келади. Визасиз мамлакатлардан келганлар ойлик нархи ўртача 8–10 минг рубль бўлган патент олади, у максимал бир йил амал қилади. Кейин эса уни янгилаш керак бўлади. Визали давлатлардан келганлар эса меҳнат рухсатномасини расмийлаштиради.

Шунингдек, бошқа бир қатор давлат божлари ҳам жорий этилиши ёки оширилиши режалаштирилмоқда – масалан, мигрантларни яшаш манзили бўйича рўйхатга олиш, вақтинчалик яшаш муддати узайтирилганда ҳамда автомобиль ва бошқа транспорт воситаларини рўйхатдан ўтказишдаги ҳаракатлар учун.

Володин бу чоралар бюджет тушумларини кўпайтиради, мигрантлар устидан назоратни кучайтиради ва ноқонуний миграцияни камайтиришга хизмат қилади, деб таъкидлаган. 

Эслатиб ўтамиз, аввалроқ Россияда мигрантларни фуқароликдан маҳрум этиш асослари кенгайтирилгани ҳақида хабар берилганди. Тегишли қонун лойиҳаси Давлат Думаси томонидан биринчи ўқишда қабул қилинган.