Россия Зеленский билан музокара ўтказмайди – Песков

Украина Президенти Владимир Зеленский шахсан ўзи имзолаган фармон асосида Россия Президенти Владимир Путин билан музокара олиб бориши мумкин эмас. Бу ҳақда Кремль матбуот котиби Дмитрий Песков бугун, 3 февраль куни журналистлар билан бўлиб ўтган матбуот анжуманида сўз очди.

Унинг сўзларига кўра, ҳозирча музокаралар масаласини ҳеч ким муҳокама қилмаган ва Россия Зеленскийни бундай музокаралар олиб боришга ҳуқуқи йўқ, деб билади. 

“Ҳозирча ҳеч ким музокаралар иштирокчиларининг эҳтимолий комбинациясини жиддий муҳокама қилмаган. Биз Украина Президентининг бундай музокаралар олиб бориш ҳуқуқи йўқ деган тахминдан келиб чиқамиз”, деган Дмитрий Песков.

Шунингдек, Кремль воизи Владимир Зеленскийнинг президентлик ваколатлари тугаганини (Украинадаги ҳарбий ҳолат туфайли президентлик сайловлари ўтказилмагани) ва бу масала можарони ҳал қилиш учун муҳим эканини таъкидлаган. 

“Мен Путиннинг яқинда айтганини эслатиб ўтмоқчиман, бу қонунийлаштириш можарони ҳал қилиш нуқтаи назаридан ҳар қандай келишувларни қонуний қайд этиш учун зарур”, деган Песков. 

Эслатиб ўтамиз, аввалроқ Украина Президенти Владимир Зеленский “Associated Press” (AP) ахборот агентлигига берган интервьюсида Киев иштирокисиз урушни тугатиш бўйича АҚШ-Россия музокаралари ҳамма учун хавф туғдириши ҳақида гапирганди. Қолаверса, Зеленскийнинг алоқа бўйича маслаҳатчиси Дмитрий Литвин АҚШнинг Украинани Россия билан ўт очишни тўхтатиш бўйича келишувдан кейин сайлов ўтказишга чақиришини “муваффақиятсиз режа” деганди.