Россия ортидан Беларусь ҳам Венесуэлага ҳужумни қоралаб чиқди

Беларусь резиденти Александр Лукашенко АҚШнинг Венесуэлага зарбаларини қоралади. Бу ҳақда унинг матбуот котиби Наталья Эйсмонт республиканинг биринчи расмий ахборот агентлиги БелТАга маълум қилди. 

“Беларусь Президенти Американинг Венесуэлага қарши тажовузкор ҳаракатини қатъиян қоралайди. Александр Лукашенко яқинда, хусусан, америкалик журналистларга берган интервьюсида бунинг оқибатлари ҳақида гапирганди. Хусусан, у “бу иккинчи Вьетнам бўлади” деди. Ва америкаликларга бу керак эмас”, дейди у.

Лукашенконинг баёноти ортидан Беларусь Ташқи ишлар вазирлиги ҳам Венесуэлага қарши тажовузни қатъий қоради. Айтилишича, Минск Лотин Америкаси мамлакатининг қонуний ҳукуматини қўллаб-қувватлайди.  

“Беларусь Республикаси Ташқи ишлар вазирлиги 2026 йил 3 январда суверен Венесуэла давлатига қарши содир этилган қуролли тажовузни қатъий қоралайди ҳамда уни халқаро тинчлик ва хавфсизликка тўғридан-тўғри таҳдид деб билади. Беларусь томони Венесуэланинг қонуний ҳукуматини қатъий қўллаб-қувватлашини билдиради ва тинчликни сақлаш учун асосий масъулиятни ўз зиммасига олган БМТ Хавфсизлик Кенгашининг шошилинч йиғилишини ўтказиш чақириғига қўшилади”, деб таъкидлади вазирлик. 

Шунингдек, вазирлик Венесуэла халқининг ўз тақдирини мустақил равишда белгилаш ҳуқуқи дахлсиз эканлигини ва ҳеч қандай ташқи аралашув, айниқса, куч ишлатиш оқланиши мумкин эмаслигини урғулаган. 

Вазирлик шунингдек, Каракасдаги Беларусь дипломатик ваколатхонаси одатдагидек ишлаётганини ва унинг ходимлари хавфсиз эканлигини маълум қилди. Бундан ташқари, Беларусь фуқароларининг аҳволини кузатиш бўйича саъй-ҳаракатлар олиб борилмоқда, улар билан боғлиқ жиддий ҳодисалар қайд этилмаган. 

АҚШнинг Венесуэлага ҳужуми

Эслатиб ўтамиз, аввалроқ Венесуэла пойтахти Каракас шаҳрида камида еттита портлаш содир бўлгани, шаҳар­нинг бир қисми электр энергиясиз қолгани ҳақида хабар берилган эди. Портлаш товушлари шаҳарнинг турли ҳудудларида, шунингдек Симон Боливар номидаги Майкетия аэропорти ва Ла-Гуайра порти атрофида ҳам эшитилган.

Кейинроқ Колумбия Президенти Густаво Петро АҚШни Венесуэлани бомбардимон қилишда айблаб, БМТнинг фавқулодда йиғилишини чақиришга чақирди. Шундан сўнг CBS телеканали АҚШ Президенти Доналд Трамп Венесуэла ҳудудидаги қатор объектларга, жумладан ҳарбий нишонларга зарба бериш буйруғини берганини маълум қилди.

Венесуэла Президенти Николас Мадуро мамлакатда кенг қамровли мудофаа тизимини зудлик билан ишга тушириш ва миллий кучларни сафарбар этиш бўйича буйруқ берди. Мамлакатда фавқулодда ҳолат режими эълон қилинди.

Бундан олдин АҚШ зарбаларидан кейин Николас Мадуронинг қаердалиги номаълумлиги, бироқ унинг энг яқин атрофидагиларнинг айримлари хавфсиз жойда экани ҳақида хабарлар тарқалган эди. 

Кейинчалик Дональд Трамп Венесуэлага қилинган ҳужум бўйича баёнот бериб, Мадуро рафиқаси билан бирга қўлга олингани ва мамлакатдан олиб чиқиб кетилганини маълум қилди. Шундан сўнг Россия АҚШнинг Венесуэалага қилган ҳужумини қоралади.