Роналдунинг ўғли қимматбаҳо машина харид қилди

Португалия терма жамоаси ва Саудия Арабистонининг “Ал Наср” клуби сардори  Криштиану Роналдунинг ўғли Криштиану Роналду Жуниор атиги 15 ёшида бўлишига қарамай, ўзининг биринчи 265 минг евролик автомобилини харид қилди. Бу ҳақда “Telegrafi” нашри хабар берди.

Кичик Роналду оқ рангли Lamborghini Urus S машинаси билан тушган суратини ижтимоий тармоқлар орқали улашди ва тез орада катта шов-шувларга сабаб бўлди. Мазкур моделнинг нархи қарийб 265 минг еврони ташкил этади. Автомобиль 650 от кучига эга турбинали V8 двигатель билан жиҳозланган бўлиб, атиги 3,5 сонияда 0 дан 100 км/соат тезликка чиқади ва максимал тезлиги 305 км/соатни ташкил этади.

Ҳозирча Роналдунинг ўғли ҳайдовчилик гувоҳномасига эга эмас. Саудия Арабистони қонунларига кўра, у 18 ёшга тўлганидан кейингина машинани мустақил бошқариш ҳуқуқига эга бўлади. Шу боис, ҳозирча у транспорт воситасидан фақат йўловчи сифатида фойдаланиши мумкин.

Эслатиб ўтамиз, аввалроқ Криштиану Роналдунинг тўнғич ўғли илк бор Португалия U-16 терма жамоасига чақирилгани ҳақида хабар берилган эди.