Роналду жароҳатдан қайтишини дубль билан нишонлади

Кеча, 3 апрель куни тунда Саудия Арабистони Про-лигаси 29-тур учрашувидан ўрин олган “Ал-Наср” – “Ал-Нажма” учрашуви бўлиб ўтди. Жароҳатдан қайтган Криштиану Роналду баҳсда дубль муаллифи бўлди.

Учрашувнинг 44-дақиқасида “Ал-Нажма” вакили Ражеҳ Алтулайҳи ҳисобни очди. Биринчи бўлимга қўшиб берилган дақиқаларда эса Абдулла Ал-Ҳамдан ва Садио Мане томонидан киритилган голлар мезбонларнинг биринчи бўлимдаги устунлигини таъминлади. Иккинчи бўлим бошланиши билан, 47-дақиқада Кордосо яна ҳисобни тенглаштирди. 56-дақиқага келиб меҳмонлар дарвозасига пенальти белгиланди. Криштиану Роналду 11 метрлик нуқтадан зарба беришда адашмади – 3:2. Орадан кўп ўтмай, Роналду яна катта саҳнага чиқди. Бу сафар у Боушалнинг ўнг қанотдан етказиб берган узатмасини дарвозага жойлаб қўйди. Иккинчи бўлимга қўшиб берилган 5-дақиқада Мане ҳам дубл қайд этиб, жамоасининг йирик ҳисобдаги ғалабасини таъминлади – 5:2.

Баҳсда дубль муаллифи бўлган Криштиану Роналду бутун фаолиятидаги голлари сонини  967 тага етказиб олди.

Маълумот ўрнида, ушбу ғалабадан сўнг “Ал-Наср” очколари сонини 70 тага етказиб олди ва турнир жадвалида пешқадамлик қилишда давом этмоқда. “Ал-Ҳилол” эса битта ўйин кам ўтказган ҳолда 64 очко жамғариб, жадвалнинг иккинчи поғонасида бормоқда.

Рамазон Усанов