Роналду учун курашга “Интер” ҳам қўшилдими? Клуб директори жавоб берди

“Ал-Наср” ҳужумчиси Криштиану Роналду мавсум якунида Саудия клубини тарк этиши мумкин, бироқ португалиялик футболчининг хизматларига Италиянинг “Интер” клуби қизиқиш билдираётгани ҳақидаги хабарлар ҳақиқатдан йироқ. Бу ҳақда “Tuttosport” хабар берди.

Манбага кўра, “нерадзуррилар” футболчига қизиқиш билдирмаяпти, чунки “Интер” бош директори Жузеппе Мароттанинг фикрича, Роналдуни сотиб олиш молиявий нуқтаи назардан қийин.

Жорий мавсумда португалиялик ҳужумчи барча турнирларда 33 та учрашувда иштирок этиб, 28 та гол урди ва 4 та голли узатмани амалга оширди. Футболчининг клуб билан амалдаги шартномаси 2025 йилнинг ёзига қадар мўлжалланган.“Transfermarkt” порталида келтирилган маълумотларга кўра, футболчининг бозор қиймати 12 миллион еврони ташкил қилади.

Эслатиб ўтамиз, аввалроқ Мадриднинг “Реал” клуби ҳам собиқ футболчисини ўз сафига қайтариши мумкинлиги хабар қилинганди.

Шунингдек, 40 ёшли Роналдуга клублар ўртасидаги Жаҳон чемпионатида иштирок этувчи бошқа бир қатор жамоалар ҳам қизиқиш билдираётгани ҳақида хабарлар тарқалмоқда.