Римда АҚШ-Эрон музокараларининг 5-раунди бўлиб ўтди

Бугун, 23 май куни Италия пойтахти Римда Уммон воситачилигида Эрон ва АҚШ ўртасидаги музокараларнинг бешинчи раунди якунланди.

Уммоннинг Римдаги элчихонасидаги йиғилиш иштирокчиларидан бири бўлган АҚШ Президенти Дональд Трампнинг махсус вакили Стив Уиткофф маҳаллий вақт билан тахминан соат 16:00 да қароргоҳни тарк этди. Ўшанда музокаралар якунлангани ҳақида даъволар бор эди, бироқ Эрон Ташқи ишлар вазирлиги матбуот котиби Исмоил Бағай давлат телевидениесига томонлар ўртасидаги сиёсий музокаралар техник музокаралар ортидан ўтганини айтди.

Унинг сўзларига кўра, Уиткофф аввалроқ режалаштирилган рейсга етиб олиш учун қароргоҳни эрта тарк этган ва музокаралар “хотиржам ва профессионал” муҳитда ўтган. Музокаралар доирасида Эрон ва Уммон Ташқи ишлар вазирлари икки томонлама музокаралар ўтказди.

Уитткофф кетганидан тахминан бир соат ўтгач, аввал АҚШ делегацияси, кейин эса Эрон делегацияси музокаралар майдонини тарк этди. Музокаралар тахминан 3,5 соат давом этди.

Ҳозирча на Эрон, на АҚШ музокаралар натижаси бўйича ҳеч қандай баёнот бергани йўқ.

Музокараларда воситачилик қилган Уммон Ташқи ишлар вазири Бедр бин Ҳамид ал-Бусаидий ижтимоий тармоқларда қуйидаги хабарни баҳам кўрди:

“Эрон ва Қўшма Штатлар ўртасидаги музокараларнинг бешинчи раунди бугун Римда бироз олдинга силжиш билан якунланди, аммо якуний натижага эришилмади. Қолган саволларга яқин кунларда ойдинлик киритамиз деган умиддамиз. Шу йўл билан биз барқарор ва муносиб келишувга эришишдек умумий мақсадимизга қараб ҳаракат қилишимиз мумкин”.

Маълумот учун, АҚШ ва Эроннинг Уммон воситачилигидаги Теҳрон ядровий дастури бўйича келишмовчиликларни бартараф этиш бўйича музокараларининг биринчиси 12 апрель куни Уммон пойтахти Маскатда, иккинчиси 19 апрель куни Римда, учинчи ва тўртинчиси 26 апрель ва 11 май куни яна Уммон пойтахтида бўлиб ўтган. Маслаҳатлашувларда Эрон делегациясига Ташқи ишлар вазири Аббос Ароқчи, Америка делегациясига эса Президентнинг махсус вакили Стивен Уиткофф бошчилик қилди.

Эслатиб ўтамиз, аввалроқ Эрон Президенти Масъуд Пезешкиён мамлакат ҳарбий-денгиз кучлари раҳбарияти билан учрашувда АҚШ Президенти Дональд Трампнинг куч ишлатиш таҳдидига қарамай, Теҳрон Вашингтон билан музокараларни давом эттириши, аммо тинч ядровий энергияни ривожлантириш ҳуқуқидан ҳеч қачон воз кечмаслиги ҳақида гапирган эди.