Рим папасининг ўлим сабаби маълум бўлди

Рим папаси Францискнинг ўлимига инсульт сабаб бўлгани айтилди. Бу ҳақда “Vatican News” хабар берди.

Ватикан томонидан эълон қилинган ўлим гувоҳномасида айтилишича, инсульт оғир ва қайтариб бўлмайдиган юрак етишмовчилигига олиб келган. Тиббий хулосага кўра, Франциск мультимикробиял икки томонлама пневмония, кўп бронхоэктазия, юқори қон босими ва II турдаги диабет туфайли келиб чиққан ўткир нафас етишмовчилигидан азият чеккан.

Рим папасининг вафоти муносабати билан Италия Бош вазири Жоржия Мелони, Россия Президенти Владимир Путин, Оқ уй, Буюк Британия қироли Чарльз III, Аргентина Президенти Хавьер Милей ва бошқалар ҳамдардлик билдирди.

Буэнос-айреслик Францискнинг вафоти муносабати билан Аргентина ҳукумати бир ҳафталик мотам эълон қилди. Испания ва Ливанда ҳам мотам эълон қилинди. Буюк Британияда мотам белгиси сифатида Британия қироли Чарльз III'нинг барча қароргоҳларида давлат байроқлари ярмига туширилади.

Маълумот учун, Франциск 2013 йилда папа этиб сайланганидан бери бир неча касалликдан азият чекиб келаётган эди. У 2021 йилнинг июль ойида ҳам 10 кун шифохонада ётиб, йўғон ичак торайишидан даволанган. Кейинчалик Франциск йўғон ичагининг бир қисмини олиб ташлаш учун жарроҳлик амалиётидан ўтган. Франциск 2022 йилдан бери тиззаларидаги оғриқ сабабли ногиронлар аравачасидан фойдаланиб келаётганди. У ўзининг соғлиғига оид муаммоларни автобиографиясида камтарона баҳолаб, шундай ёзганди: “Мен яхшиман. Ҳақиқат шуки, мен шунчаки қарияпман.”

Католик черковининг янги раҳбарини сайлаш учун Франциск вафотидан 15-20 кун ўтгач конклав чақирилади. Ҳар қандай католик эркак бу лавозимга ўз номзодини қўйиши мумкин, лекин у одатда кардиналлардан бири бўлади.

Италиянинг “La Stampa” газетаси ҳозирда Ватикан давлат котиби лавозимини эгаллаб турган Пьетро Паролинни Рим папаси лавозимига энг эҳтимолий номзод сифатида кўрсатди. Паролин, нашрнинг таъкидлашича, “черковни очиқ сақлай олади”.

Эслатиб ўтамиз, жорий йилнинг 14 февраль куни марҳум Рим папаси Франциск узоқ вақтдан бери давом этаётган бронхитни даволаш учун шифохонага олиб борилганди.