Рим папасининг ўпкасидаги ўсимта олиб ташланди

Рим папаси Лев XIV ўпкасидаги саратон ўсмасини олиб ташлаш бўйича операциядан сўнг шифохонадан чиқишга рухсат олди. У бугун, 17 октябрь куни Римдаги Жемелли шифохонасидан Ватиканга қайтади. Бу ҳақда Ватикан матбуот хизматига таяниб, “Euronews” хабар берди.

Қайд этилишича, 71 ёшли понтифик жорий йилнинг 13 октябрь куни ўнг ўпкасида ўтказилган операциядан бери шифохонада даволанаётган эди. https://qalampir.uz/news/rim-papasi-saratonga-chalindi-144513

Шифокорлар қон таҳлиллари ва кўкрак қафаси рентген текшируви натижаларини баҳолаб, унинг шифохонадан чиқиши мумкин деган хулосага келган.

Ватикан матбуот хизмати маълумотига кўра, Лев XIV бугун тушдан кейин шифохонани тарк этиб, Ватиканга қайтади. Эртага эса у папа қароргоҳи деразасидан туриб, анъанавий “Анжелус” ибодатини ўқийди.

Аввалроқ, операция давомида папанинг ўнг ўпкасининг пастки бўлаги олиб ташлангани маълум қилинган эди. Шифокорлар унда ўпка аденокарциномаси – ўпка саратонининг тури аниқланганини тасдиқлаган.

Операция тахминан 90 дақиқа давом этган ва асоратларсиз якунланган. Жорий йилнинг 15 октябрь куни ўтказилган рентген текшируви ҳам зарарланган ўпканинг яхши тикланаётганини кўрсатган.

Эслатиб ўтамиз, аввалроқ Рим папаси Лев XIV Россия Президенти Владимир Путинни Украинадаги Олешки шаҳрига гуманитар ёрдам етказиш ва тинч аҳолини хавфсиз эвакуация қилиш учун сулҳ эълон қилишга чақиргани ҳақида хабар берилган эди.