Рим папасининг дафн маросими қачон бўлиши эълон қилинди

Рим папаси Францискнинг дафн маросими жорий йилнинг 26 апрель куни бўлиб ўтади. Бу ҳақда “Reuters” хабар берди.

Маълум қилинишича, аввалдан Франциск папаларнинг дафн маросимини “ортиқча” деб ҳисоблаган ва бир нечта анъанавий тадбирлардан воз кечган.

Қайд этилишича, Францискни Ватиканга эмас, балки Санта-Мария-Мажор Рим базиликасига дафн этишади.

Маросимга АҚШ Президенти Дональд Трамп, Франция Президенти Эммануэль Макрон ва Бразилия Президенти Луис Инасиу Лула да Силва келиши режалаштирилган.

Буэнос-айреслик Францискнинг вафоти муносабати билан Аргентина ҳукумати бир ҳафталик мотам эълон қилган. Испания ва Ливанда ҳам мотам эълон қилинган. Буюк Британияда мотам белгиси сифатида Британия қироли Чарльз IIIʼнинг барча қароргоҳларида давлат байроқлари ярмига туширилиши режалаштирилган.

Маълумот учун, Франциск 2013 йилда папа этиб сайланганидан бери бир неча касалликдан азият чекиб келаётган эди. У 2021 йилнинг июль ойида ҳам 10 кун шифохонада ётиб, йўғон ичак торайишидан даволанган. Кейинчалик Франциск йўғон ичагининг бир қисмини олиб ташлаш учун жарроҳлик амалиётидан ўтган. Франциск 2022 йилдан бери тиззаларидаги оғриқ сабабли ногиронлар аравачасидан фойдаланиб келаётганди.

Эслатиб ўтамиз, Рим папаси Франциск 21 апрель куни 88 ёшида вафот этганди. Францискнинг ўлимига инсульт сабаб бўлгани айтилди. Ватикан томонидан эълон қилинган ўлим гувоҳномасида қайд этилишича, инсульт оғир ва қайтариб бўлмайдиган юрак етишмовчилигига олиб келган. Тиббий хулосага кўра, Франциск мультимикробиял икки томонлама пневмония, кўп бронхоэктазия, юқори қон босими ва ИИ турдаги диабет туфайли келиб чиққан ўткир нафас етишмовчилигидан азият чеккан.