Рим папасининг аҳволи оғирлашди

Нафас олиш йўллари инфекцияси билан шифохонага ётқизилган Рим папаси Франциснинг аҳволи оғирлашди ва понтификка қон қуйилди. Бу ҳақда “Vatican News” хабар берди.

north_east

Ўлишимни соғинди кимлар. Папа унинг ажалини кутаётганлар ҳақида гапирди

Айтилишича, Францис узоқ давом этган астматик нафас олиш инқирози учун тиббий ёрдамга муҳтож ва қон тестлари анемия туфайли келиб чиққан тромбоцитлар сони камайганини кўрсатган.

Шу билан бирга, Ватиканнинг қўшимча қилишича, баъзи қон тестлари енгил буйрак етишмовчилигини кўрсатган. 88 ёшли Рим папаси Франциск узоқ вақтдан бери давом этаётган бронхитни даволаш учун жорий йилнинг 14 февраль куни шифохонага олиб борилганди. Франциск бир қатор диагностик текширувлардан ўтиши ва бронхитни даволашни давом эттириши керак эди. У сўнгги икки умумий тингловда ҳамда бошқа тадбирларда ўзининг олдиндан тайёрланган нутқларини ўқиб беришни бир неча марта бошқалардан сўраган.

Маълумот учун, Франциск 2013 йилда папа этиб сайланганидан бери бир неча касалликдан азият чекиб келмоқда. У 2021 йилнинг июль ойида ҳам 10 кун шифохонада ётиб, йўғон ичак торайишидан даволанган. Кейинчалик Франциск йўғон ичагининг бир қисмини олиб ташлаш учун жарроҳлик амалиётидан ўтган. 

2024 йилнинг январь ойида Франциск “Associated Press”га берган интервьюсида унга йўғон ичак жарроҳлиги ўтказишга сабаб бўлган ичак муаммолари қайта юзага келганини, бироқ улар назорат остида эканини айтган. 

Январь ойида у ўнг қўлида бинт боғланган ҳолда кўриниш берган. Ватикан маълумотига кўра, папа ўнг билагидан “зарба олган” ва бинт шунчаки “эҳтиёт чораси” сифатида ишлатилган.

Франциск 2022 йилдан бери тиззаларидаги оғриқ сабабли ногиронлар аравачасидан фойдаланиб келмоқда. У ўзининг соғлиғига оид муаммоларни автобиографиясида камтарона баҳолаб, шундай ёзган: “Мен яхшиман. Ҳақиқат шуки, мен шунчаки қарияпман”.