“Реал Мадрид” Билбаода йирик ғалабага эришди

Кеча, 3 декабрь куни “Реал Мадрид” Суперкубок учрашувлари сабаб Ла Лига 19-турини муддатидан олдин ўтказди. Ушбу тур доирасида мадридликлар сафарда “Атлетик Билбао”ни 3:0 ҳисобида мағлуб этди.

Ўйин бошидан бошлаб Хаби Алонсо шогирдлари ташаббусни қўлга олди ва 7-дақиқада жамоа ҳужумчиси Килиан Мбаппе ҳисобни очди. Шундан сўнг мезбонлар бир неча бор жавоб қайтаришга уриниб кўрди, аммо “Атлетик Билбао”га аниқлик ва омад етишмади. Биринчи бўлимнинг 42-дақиқасида Мбаппенинг аниқ узатмасидан сўнг Эдуардо Камавинга ҳисобни 2:0 кўринишига олиб келди.

Иккинчи бўлимнинг 59-дақиқасида Мбаппе жарима майдончаси ташқарисидан йўллаган кучли зарба билан дублни расмийлаштирди. Учрашув шу ҳисоб билан якун топди ва “Реал Мадрид” муҳим 3 очкони қўлга киритди.

Маълумот учун, “Реал Мадрид” ушбу ғалабадан кейин 36 очко жамғарган ҳолда Ла Лига турнир жадвалида 2-ўринда бормоқда. “Атлетик Билбао” эса 20 очко билан 8-поғонада бормоқда. Навбатдаги турда мадридликлар ўз майдонида “Селта” жамоасини қабул қилади. Эрнасто Вальверде шогирдлари эса “Атлетико Мадрид” билан баҳс олиб боради.